पुणे विद्यापीठासह तीन विद्यापीठांत ‘कुलपती पदक’; १० लाखांचा निधी

मुंबई: विद्यार्थ्यांच्या केवळ शैक्षणिक गुणवत्तेलाच नव्हे, तर त्यांच्या सर्वांगीण विकासाला आणि विविध क्षेत्रातील उत्कृष्ट कामगिरीला प्रोत्साहन देण्यासाठी राज्याच्या उच्च शिक्षण क्षेत्रात एक महत्त्वपूर्ण पाऊल उचलण्यात आले आहे. सावित्रीबाई फुले पुणे विद्यापीठ, मुंबई विद्यापीठ आणि राष्ट्रसंत तुकडोजी महाराज नागपूर विद्यापीठात आता ‘कुलपती पदक’ प्रदान करण्यात येणार आहे. राज्यपाल तथा कुलपती जिष्णू देव वर्मा यांच्या विशेष पुढाकाराने या उपक्रमाची सुरुवात करण्यात आली असून, बुधवारी मुंबईतील लोकभवनात राज्यपालांच्या हस्ते तिन्ही विद्यापीठांच्या कुलगुरूंना या उपक्रमासाठी प्रत्येकी १० लाख रुपयांचा प्रातिनिधिक धनादेश प्रदान करण्यात आला.

         या विशेष कार्यक्रमात राज्यपाल जिष्णू देव वर्मा यांच्या हस्ते ‘इन्स्टिट्यूट ऑफ हायर ॲण्ड डिजिटल लर्निंग इंडस्ट्री-अकॅडेमिया कोलॅबोरेशन फॉर इम्प्रूव्हिंग एम्प्लॉयेबिलिटी’ या नवीन उपक्रमाचाही अधिकृत शुभारंभ करण्यात आला. ‘कुलपती पदक’ हे केवळ अभ्यासापुरते किंवा गुणांपुरते मर्यादित न ठेवता विद्यार्थ्यांच्या सर्वांगीण व्यक्तिमत्त्वाचा विकास, नेतृत्वगुण, नवोन्मेष, क्रीडा व सांस्कृतिक क्षेत्रातील कामगिरी, सामाजिक बांधिलकी आणि विद्यापीठाच्या विकासातील विशेष योगदान या सर्व घटकांची दखल घेणारे असावे, अशी स्पष्ट अपेक्षा राज्यपाल वर्मा यांनी व्यक्त केली आहे. या अत्यंत प्रतिष्ठित पदकासाठी पात्र विद्यार्थ्यांची निवड करताना विद्यापीठांनी अत्यंत पारदर्शक आणि पूर्णपणे गुणवत्ताधिष्ठित निकष निश्चित करावेत, असे निर्देशही त्यांनी यावेळी दिले.

         विद्यार्थ्यांमध्ये निकोप स्पर्धेची भावना निर्माण करून त्यांना उच्च ध्येये निश्चित करण्यासाठी आणि उत्कृष्ट कामगिरीसाठी प्रेरित करणे, हा यामागील मुख्य उद्देश असल्याचे राज्याचे राज्यपाल सचिव डॉ. प्रशांत नारनवरे यांनी स्पष्ट केले. हे पदक वर्गखोली, प्रयोगशाळा, क्रीडांगण, रंगमंच, समाजसेवा आणि नवोन्मेष या सर्व क्षेत्रांतील सर्वोच्च उत्कृष्टतेचे प्रतीक ठरेल, असा विश्वास त्यांनी व्यक्त केला. या दिमाखदार सोहळ्याला सावित्रीबाई फुले पुणे विद्यापीठाचे कुलगुरू डॉ. सुरेश गोसावी, मुंबई विद्यापीठाचे कुलगुरू डॉ. रवींद्र कुलकर्णी, राष्ट्रसंत तुकडोजी महाराज नागपूर विद्यापीठाच्या कुलगुरू डॉ. मनाली क्षीरसागर यांच्यासह विविध विद्यापीठांचे प्र-कुलगुरू, संचालक आणि अधिष्ठाता मोठ्या संख्येने उपस्थित होते.