राम मंदिर ट्रस्टचे पहिले सीईओ म्हणून एअर मार्शल जितेंद्र मिश्रा यांची निवड

अयोध्या: अयोध्येतील श्री राम जन्मभूमी तीर्थ क्षेत्र ट्रस्टच्या पहिल्या मुख्य कार्यकारी अधिकारी (CEO) पदी भारतीय हवाई दलाचे निवृत्त एअर मार्शल जितेंद्र मिश्रा यांच्या नावावर अधिकृतरीत्या शिक्कामोर्तब करण्यात आले आहे. आज पार पडलेल्या महत्त्वाच्या बैठकीत हा निर्णय घेण्यात आला असून, या उच्चस्तरीय नियुक्तीमुळे राम मंदिराच्या प्रशासकीय व्यवस्थापनाला आणि आगामी विकास कामांना अधिक गतिशीलता व शिस्त लाभण्याची शक्यता वर्तवली जात आहे. जितेंद्र मिश्रा यांनी भारतीय हवाई दलात तब्बल ३९ वर्षे निष्कलंक सेवा बजावली असून, याच वर्षी ३० एप्रिल रोजी ते निवृत्त झाले आहेत. निवृत्तीपूर्वी त्यांनी हवाई दलाच्या अत्यंत संवेदनशील अशा पश्चिम कमांडचे (Western Air Command) एअर ऑफिसर कमांडिंग-इन-चीफ म्हणून महत्त्वाची जबाबदारी यशस्वीपणे सांभाळली होती.

       हवाई दलातील त्यांच्या दिमाखदार आणि प्रेरणादायी कारकिर्दीत त्यांनी अनेक धाडसी मोहिमांचे नेतृत्व केले आहे. विशेषतः कारगिल युद्धाच्या काळात पार पडलेले ‘ऑपरेशन सिंदूर’, तसेच टायगर हिल आणि ‘सफेड सागर’ यांसारख्या अत्यंत महत्त्वाच्या ऑपरेशन्स मध्ये त्यांनी महत्त्वाची भूमिका बजावली होती. त्यांच्या नावावर तब्बल ३ हजार तासांपेक्षा अधिक काळ विमान उड्डाणाचा दांडगा अनुभव जमा आहे. आपल्या सेवाकाळात त्यांनी १८ पेक्षा जास्त प्रकारची फायटर विमाने, ट्रान्सपोर्ट विमान आणि विविध प्रकारच्या हेलिकॉप्टर्सचे यशस्वी उड्डाण केले आहे. मिग-२१ फायटर स्क्वाड्रनचे कमांडिंग ऑफिसर, एएसटीई (ASTE) आणि एचएएल (HAL) नाशिकचे चीफ टेस्ट पायलट, तसेच बरेली आणि पठाणकोट येथील विंगचे एअर ऑफिसर कमांडिंग अशा अत्यंत उच्च आणि जबाबदारीच्या पदांवर त्यांनी काम केले आहे. याशिवाय, ऑपरेशनल प्लॅनिंग, एअर स्टाफ रिक्वायरमेंट्स आणि मोठे सामरिक प्रकल्प हाताळण्याचा त्यांना व्यापक अनुभव आहे.

        त्यांच्या या उल्लेखनीय देशसेवेचा आणि शौर्याचा गौरव म्हणून त्यांना अनेक प्रतिष्ठित राष्ट्रीय पुरस्कारांनी सन्मानित करण्यात आले आहे. ‘ऑपरेशन सिंदूर’मधील उत्कृष्ट कामगिरी बद्दल त्यांना ‘सर्वोत्तम युद्ध सेवा मेडल’ प्रदान करण्यात आले आहे. यासोबतच २०२४ मध्ये ‘अति विशिष्ट सेवा मेडल’ आणि २०१३ मध्ये ‘विशिष्ट सेवा मेडल’ देऊन त्यांना गौरविण्यात आले होते. त्यांची शैक्षणिक पार्श्वभूमी अत्यंत उच्च दर्जाची असून, त्यांनी पुणे येथील राष्ट्रीय संरक्षण प्रबोधिनी (NDA खडकवासला), एअर फोर्स अकादमी डुंडीगल आणि एअर फोर्स टेस्ट पायलट्स स्कूल, बंगळुरू येथून प्रशिक्षण घेतले आहे. तसेच, अमेरिकेतील एअर कमांड अँड स्टाफ कॉलेज आणि ब्रिटन मधील प्रतिष्ठित रॉयल कॉलेज ऑफ डिफेंस स्टडीज मधून त्यांनी उच्च शिक्षण पूर्ण केले आहे. लष्करातील खडतर अनुभवाचा आणि शिस्तीचा मोठा वारसा असलेल्या जितेंद्र मिश्रा यांच्याकडे राम मंदिर ट्रस्टच्या प्रशासनाची धुरा आल्याने या प्रकल्पाचे नियोजन अधिक प्रभावीपणे होईल, अशी अपेक्षा व्यक्त होत आहे.