सातारा शिक्षण-आरोग्यात अव्वल व्हावा, शंभूराज देसाईंचे विकासकामे पूर्ण करण्याचे निर्देश

सातारा: प्राथमिक शिक्षण आणि सार्वजनिक आरोग्य या दोन्ही महत्त्वाच्या क्षेत्रांमध्ये सातारा जिल्ह्याला संपूर्ण महाराष्ट्रात अव्वल स्थानावर राखण्यासाठी प्रशासकीय यंत्रणेने अधिक सक्रिय व्हावे, असे स्पष्ट निर्देश पालकमंत्री शंभूराज देसाई यांनी दिले आहेत. ‘माझी शाळा आदर्श शाळा’ आणि ‘स्मार्ट प्राथमिक आरोग्य केंद्र’ या महत्त्वाकांक्षी योजनांतर्गत जिल्ह्यात सध्या सुरू असलेल्या विविध विकास कामांना गती देऊन ती आगामी डिसेंबर अखेरपर्यंत पूर्ण करावीत, अशी सक्त ताकीद त्यांनी जिल्हाधिकारी कार्यालयातील नियोजन भवनात पार पडलेल्या आढावा बैठकीत दिली.

      जिल्हाधिकारी कार्यालयात झालेल्या या उच्चस्तरीय आढावा बैठकीस जिल्हाधिकारी संतोष पाटील, मुख्य कार्यकारी अधिकारी याशनी नागराजन, जिल्हा नियोजन अधिकारी यशवंत थोरात यांच्यासह विविध विभागांचे प्रमुख अधिकारी आणि सर्व तालुक्यांचे गटविकास अधिकारी उपस्थित होते. यावेळी बोलताना पालकमंत्री शंभूराज देसाई यांनी जिल्हा परिषदेच्या अंतर्गत येणाऱ्या सर्व प्राथमिक शाळा आणि ग्रामीण भागातील आरोग्य केंद्रांच्या बळकटीकरणावर विशेष भर दिला. प्रकल्पांची अंमलबजावणी करताना गुणवत्तेशी तडजोड न करता ठरवून दिलेल्या मुदतीत सर्व कामे पूर्ण करण्याच्या सूचना त्यांनी दिल्या. विशेषतः, जिल्ह्यातील सर्व स्मार्ट प्राथमिक आरोग्य केंद्रे आणि आदर्श शाळा भविष्यात पूर्णपणे सौर ऊर्जेवर कार्यान्वित करण्यात याव्यात, जेणेकरून ग्रामीण भागात वीजपुरवठ्याची कोणतीही अडचण निर्माण होणार नाही, अशी महत्त्वाची सूचना त्यांनी यंत्रणेला केली.

        ज्या भागातील आदर्श शाळांची कामे पूर्ण झाली आहेत, त्या शाळांना संबंधित गट शिक्षणाधिकाऱ्यांनी पुढील पंधरा दिवसांच्या आत प्रत्यक्ष भेट देऊन तेथील कामांची पाहणी करावी, असे निर्देश पालकमंत्र्यांनी दिले. याशिवाय, सातारा जिल्ह्यातील प्रत्येक नगरपरिषद हद्दीत जिल्हा वार्षिक योजनेतून दरवर्षी किमान एक नवीन आदर्श शाळा उभारण्यात यावी, असा उपक्रम हाती घेण्याच्या सूचनाही त्यांनी दिल्या. केंद्र शासनाच्या धोरणा नुसार शिक्षण आणि सार्वजनिक आरोग्याला प्राधान्य देण्यात येत असून, या योजनांसाठी निधीची कोणतीही कमतरता भासू दिली जाणार नाही, असे त्यांनी स्पष्ट केले.

        विकास कामांना गती मिळावी आणि प्रशासकीय पातळीवर सुसंवाद राहावा यासाठी मुख्य कार्यकारी अधिकारी यांनी दर पंधरा दिवसांनी या कामांचा नियमित आढावा घ्यावा, असे आदेश पालकमंत्र्यांनी दिले. शिक्षण व आरोग्य या दोन्ही क्षेत्रांत सातारा जिल्हा राज्यात नेहमीच अग्रेसर राहावा, यासाठी सर्व संबंधित विभागात समन्वय ठेवून निश्चित मुदतीत कामे पूर्ण करावीत आणि जिल्ह्याचे मानांकन उंचावण्यासाठी कटिबद्ध राहावे, असे आवाहन पालकमंत्री शंभूराज देसाई यांनी या बैठकीच्या माध्यमातून केले आहे.