पैठणला १००, पाचोडला ५० खाटांचे रुग्णालय; कुंभमेळ्यापूर्वी आरोग्यसेवेला बळ

मुंबई: आगामी सिंहस्थ कुंभमेळा आणि सातत्याने वाढणाऱ्या धार्मिक पर्यटनाचा सखोल विचार करून छत्रपती संभाजीनगर जिल्ह्यातील आरोग्य यंत्रणा अधिक बळकट, सक्षम आणि अत्याधुनिक करण्यासाठी राज्य शासनाने महत्त्वपूर्ण पावले उचलली आहेत. 'दक्षिण काशी' म्हणून जगप्रसिद्ध असलेल्या पैठण येथे १०० खाटांचे उपजिल्हा रुग्णालय आणि वर्दळीच्या तसेच तीन जिल्ह्यांच्या सीमेलगत असलेल्या पाचोड येथे ५० खाटांचे ग्रामीण रुग्णालय उभारण्यात यावे, असे स्पष्ट निर्देश सार्वजनिक आरोग्य व कुटुंब कल्याण मंत्री प्रकाश आबिटकर यांनी दिले आहेत. या महत्त्वाच्या आरोग्य प्रकल्पांसाठीचा प्रस्ताव विशेष बाब म्हणून तातडीने शासनाकडे सादर करण्याचे आदेश त्यांनी संबंधित प्रशासनाला दिले आहेत.

       मंत्रालयातील समिती कक्षात छत्रपती संभाजीनगर जिल्ह्यातील आरोग्य सुविधांच्या सद्यस्थितीचा आढावा घेण्यासाठी एका उच्चस्तरीय बैठकीचे आयोजन करण्यात आले होते. स्थानिक आमदार विलास (बापू) संदिपान भुमरे यांच्या विशेष उपस्थितीत पार पडलेल्या या बैठकीत जिल्ह्यातील ग्रामीण व शहरी भागातील आरोग्य सेवांचा सखोल आढावा घेण्यात आला. या बैठकीस सार्वजनिक आरोग्य विभागाचे आयुक्त संजय काटकर, सहसंचालिका डॉ. सुनीता गोल्हाईत यांच्यासह विभागाचे इतर वरिष्ठ अधिकारी उपस्थित होते.

         पैठण हे देशातील आणि राज्यातील लाखो भाविकांचे श्रद्धास्थान असून 'दक्षिण काशी' म्हणून या क्षेत्राची मोठी ख्याती आहे. आगामी काळात येथे भरणाऱ्या कुंभमेळ्याच्या निमित्ताने देश-विदेशातून येणाऱ्या भाविकांची आणि पर्यटकांची संख्या मोठ्या प्रमाणात वाढण्याची दाट शक्यता आहे. या पार्श्वभूमीवर भाविकांना आणि स्थानिकांना तात्काळ व उत्तम वैद्यकीय सुविधा उपलब्ध व्हाव्यात, यासाठी पैठणमध्ये १०० खाटांचे अत्याधुनिक उपजिल्हा रुग्णालय उभारण्याचा प्रस्ताव विशेष बाब म्हणून तयार करण्यात यावा, असे सांगत मंत्री आबिटकर यांनी या प्रस्तावाच्या मंजुरीसाठी मुख्यमंत्री महोदयांकडे आवश्यक तो सर्व पाठपुरावा केला जाईल, अशी ग्वाही दिली.

         याचबरोबर, राष्ट्रीय महामार्गावरील अत्यंत मोक्याचे ठिकाण आणि तीन जिल्ह्यांची सीमा एकत्र येणाऱ्या पाचोड परिसरात दिवसें दिवस वाढणारी लोकसंख्या तसेच वाहतुकीचा सततचा ताण लक्षात घेता, तिथेही ५० खाटांचे नवीन ग्रामीण रुग्णालय उभारण्याचा प्रस्ताव सादर करण्याचे निर्देश मंत्र्यांनी दिले आहेत. याशिवाय, छत्रपती संभाजीनगर शहरात नव्याने उभारण्यात आलेल्या ४०० खाटांच्या भव्य महिला रुग्णालयाचे लवकरात लवकर लोकार्पण करण्यात यावे, यासाठी आवश्यक असलेले मंजूर मनुष्यबळ, अत्याधुनिक वैद्यकीय उपकरणे आणि इतर सर्व पायाभूत सुविधांची तयारी युद्धपातळीवर पूर्ण करण्याच्या सूचना त्यांनी दिल्या. पैठण व पाचोड येथील प्रस्तावित आरोग्य संस्था आणि महिला रुग्णालयाच्या या प्रकल्पांमुळे संपूर्ण मराठवाड्यातील विशेषतः ग्रामीण व आदिवासी भागातील नागरिकांना अत्यंत दर्जेदार वैद्यकीय सेवा सुलभपणे उपलब्ध होणार आहेत.