मुंबई: मराठा आरक्षण आंदोलनाचे नेते मनोज जरांगे पाटील यांनी आगामी १५ सप्टेंबर पासून मुंबईच्या आझाद मैदानावर उपोषण आणि आंदोलनाची घोषणा केल्यानंतर राज्यातील राजकीय वर्तुळात प्रचंड खळबळ उडाली आहे. सध्या अंतरवाली सराटी येथे सुरू असलेल्या उपोषणाचा १५ वा दिवस असताना जरांगे यांनी घेतलेल्या या आक्रमक भूमिकेवर ज्येष्ठ वकील गुणरत्न सदावर्ते यांनी अत्यंत तिखट शब्दांत तीव्र प्रतिक्रिया दिली आहे. गणेशोत्सवाच्या पूर्वसंध्येला मुंबईत आंदोलन पुकारत सणासुदीच्या काळात मुंबईकरांच्या आनंदात विघ्न आणण्याचा प्रयत्न केला जात असल्याचा गंभीर आरोप त्यांनी केला असून, या आंदोलना विरोधात आपण कायदेशीर लढा देणार असल्याचे जाहीर केले आहे.
मनोज जरांगे पाटील यांनी अंतरवाली सराटीत बोलावलेल्या मराठा बांधवांच्या बैठकीत आगामी १५ सप्टेंबर रोजी हजारो मराठा बांधवांसह मुंबईकडे प्रस्थान करण्याचे आणि आझाद मैदानावर आमरण उपोषण सुरू करण्याचे जाहीर केले. या घोषणेनंतर राजकारणात आरोप-प्रत्यारोपांच्या फैरी झडण्यास सुरुवात झाली आहे. यावर प्रतिक्रिया देताना गुणरत्न सदावर्ते यांनी केवळ जरांगे यांच्यावरच नव्हे, तर राज्यातील प्रमुख विरोधी पक्षांच्या नेत्यांवरही निशाणा साधला. गणेशोत्सवाचा काळ आंदोलनासाठी जाणीव पूर्वक निवडण्यात आला असून, याद्वारे मुंबईतील जनजीवनाला आणि सणांना वेठीस धरले जात आहे, असा दावा सदावर्ते यांनी केला. तसेच, या संपूर्ण प्रकरणावर मनसे अध्यक्ष राज ठाकरे, शिवसेना (उद्धव बाळासाहेब ठाकरे) पक्षप्रमुख उद्धव ठाकरे आणि खासदार संजय राऊत यांच्यासह विरोधी पक्षाचे नेते मूग गिळून गप्प का आहेत, असा संतप्त सवाल त्यांनी उपस्थित केला. या आंदोलनामुळे सर्वसामान्य नागरिकांना आणि विशेषतः विद्यार्थ्यांना शिक्षणापासून वंचित राहावे लागल्यास त्याची जबाबदारी कोण घेणार, असा प्रश्नही त्यांनी विचारला.
जरांगे यांच्या भूमिकेवर कडाडून टीका करताना सदावर्ते म्हणाले की, आंदोलनाचे नेमके लक्ष्य प्रशासनाला आणि मुख्यमंत्र्यांच्या निवासस्थानाला वेठीस धरण्याचे असल्याचे दिसून येत असून, अशा प्रकारे कायदा हातात घेण्याचे प्रकार खपवून घेतले जाणार नाहीत. मुंबईतील आझाद मैदानावर संध्याकाळी ५ वाजेनंतर आंदोलनाचे नियम काय सांगतात, याची आठवण करून देत कायद्यापेक्षा कोणीही मोठे असू शकत नाही, असे त्यांनी स्पष्ट केले. या देशात किंवा राज्यात कोणालाही कायदा डावलून मनमानी करण्याची मुभा दिली जाऊ शकत नाही, असे सांगत त्यांनी जरांगे यांच्या काही मागण्यांवर व भूमिकेवर कडाडून विरोध दर्शवला.
सणासुदीच्या काळात मुंबईकरांवर आणि लाडक्या गणेशभक्तांवर येणाऱ्या या संकटामुळे जनतेचा तीव्र उद्रेक होईल आणि गणेशभक्त तसेच महाराष्ट्राची जनता या भूमिकेला कधीही माफ करणार नाही, असा इशाराही त्यांनी दिला. हे आंदोलन रोखण्यासाठी आणि कायद्याचे काटेकोर पालन करण्यासाठी आपण या सर्व बाबी कायदेशीर मार्गाने न्यायालयात मांडणार असल्याचे जाहीर करत गुणरत्न सदावर्ते यांनी आगामी काळात या संघर्षाला अधिक तीव्र रूप देण्याचे संकेत दिले आहेत.
1.jpg)
