सरकारी नोकरीची मोठी संधी; दिल्ली पोलीस, सीएपीएफमध्ये १,८७१ पदांची भरती

नवी दिल्ली : सरकारी नोकरीच्या तयारीत असलेल्या तरुणांसाठी मोठी संधी उपलब्ध झाली आहे. कर्मचारी निवड आयोगाने (SSC) दिल्ली पोलीस आणि केंद्रीय सशस्त्र पोलीस दलांमध्ये उपनिरीक्षक पदाच्या भरतीची अधिसूचना जाहीर केली आहे. या भरती प्रक्रियेतून एकूण १ हजार ८७१ पदे भरली जाणार आहेत. पात्र उमेदवारांना ३० सप्टेंबर २०२६ रोजी रात्री ११ वाजेपर्यंत ऑनलाइन अर्ज करता येणार आहे.

कोणत्या विभागात किती जागा?

या भरतीमध्ये सीमा सुरक्षा दलातील (BSF) उपनिरीक्षक पदाच्या ४५७ जागा, केंद्रीय औद्योगिक सुरक्षा दलातील (CISF) २५० जागा, केंद्रीय राखीव पोलीस दलातील (CRPF) २५४ जागा, भारत-तिबेट सीमा पोलिसातील (ITBP) १८७ जागा आणि सशस्त्र सीमा दलातील (SSB) १७२ जागा आहेत.

याशिवाय दिल्ली पोलिसातील उपनिरीक्षक (कार्यकारी) पदाच्या २१७ जागा आणि सीआयएसएफमधील उपनिरीक्षक (अग्निशमन) पदाच्या पुरुष प्रवर्गातील २३४ जागा भरण्यात येणार आहेत.

अर्ज कधीपर्यंत करता येणार?

ऑनलाइन अर्ज प्रक्रिया १० सप्टेंबर २०२६पासून सुरू झाली आहे. उमेदवारांना ३० सप्टेंबर २०२६ रोजी रात्री ११ वाजेपर्यंत अर्ज करता येईल. अर्ज शुल्क भरण्यासाठीही आयोगाने स्वतंत्र अंतिम मुदत निश्चित केली आहे.

शैक्षणिक पात्रता काय?

या पदांसाठी अर्ज करणाऱ्या उमेदवारांकडे मान्यताप्राप्त विद्यापीठाची पदवी किंवा समतुल्य शैक्षणिक पात्रता असणे आवश्यक आहे. पदवीची अंतिम परीक्षा दिलेली असून निकालाची प्रतीक्षा करणारे उमेदवारही आयोगाच्या नियमांनुसार अर्ज करू शकतात.

वयोमर्यादा किती?

उमेदवारांचे वय २० ते २५ वर्षांच्या दरम्यान असणे आवश्यक आहे. अनुसूचित जाती, अनुसूचित जमाती, इतर मागासवर्ग तसेच केंद्र सरकारच्या नियमानुसार पात्र प्रवर्गांना वयोमर्यादेत सवलत दिली जाणार आहे.

किती मिळणार पगार?

निवड झालेल्या उमेदवारांना सातव्या वेतन आयोगा नुसार वेतनस्तर-६ लागू होणार असून, ३५ हजार ४०० ते १ लाख १२ हजार ४०० रुपये वेतनश्रेणी असेल. याशिवाय नियमा नुसार इतर भत्ते आणि सुविधा मिळणार आहेत.

ऑनलाइन अर्ज कुठे करायचा?

पात्र आणि इच्छुक उमेदवारांनी कर्मचारी निवड आयोगाच्या अधिकृत संकेतस्थळावर जाऊन ऑनलाइन अर्ज करावा. अर्ज भरताना वैयक्तिक माहिती, शैक्षणिक तपशील आणि आवश्यक कागदपत्रांची माहिती काळजीपूर्वक भरावी.

अर्ज सादर करण्यापूर्वी भरलेली सर्व माहिती तपासून घेणे महत्त्वाचे आहे. तसेच, छायाचित्र आणि स्वाक्षरी आयोगाने दिलेल्या निकषांनुसार अपलोड करावी. अंतिम तारखेच्या दिवशी संकेतस्थळावर तांत्रिक अडचणी किंवा मोठी गर्दी होण्याची शक्यता असल्याने उमेदवारांनी वेळेपूर्वी अर्ज प्रक्रिया पूर्ण करण्याचे आवाहन करण्यात आले आहे.

ऑनलाइन अर्ज प्रक्रिया १० सप्टेंबर २०२६ पासून 

महत्त्वाची तारीख :  ३० सप्टेंबर २०२६ — ऑनलाइन अर्जाची अंतिम मुदत.