नवी दिल्ली: देशभरातील बँकिंग क्षेत्रातील कर्मचाऱ्यांच्या विविध प्रलंबित मागण्यांसाठी युनायटेड फोरम ऑफ बँक युनियन्सने (UFBU) पुकारलेल्या देशव्यापी संपामुळे उद्या म्हणजेच ११ सप्टेंबर रोजी सार्वजनिक सुट्टी नसतानाही देशभरातील सरकारी बँकांचे कामकाज ठप्प होण्याची दाट शक्यता निर्माण झाली आहे. बँक युनियन आणि शासन स्तरावर संप टाळण्यासाठी झालेल्या चर्चा निष्फळ ठरल्यामुळे ११ सप्टेंबरचा संप आता निश्चित मानला जात आहे. या संपामुळे आगामी चार दिवस सलग बँकिंग सेवांवर परिणाम होणार असल्याने नागरिकांना आपल्या आर्थिक व्यवहारांचे नियोजन करताना काळजी घ्यावी लागणार आहे.
आठवड्यातून केवळ ५ दिवस काम करण्याचा नियम लागू करावा आणि इतर प्रमुख मागण्या लवकरात लवकर मान्य कराव्यात, या प्रमुख मागण्यांसाठी हा देशव्यापी संप पुकारण्यात आला आहे. जोपर्यंत शासन या मागण्यांवर कोणताही ठोस निर्णय घेत नाही आणि अंमलबजावणी साठी निश्चित मुदत ठरवत नाही, तोपर्यंत संप मागे घेण्याचा प्रश्नच उद्भवत नाही, अशी आक्रमक भूमिका बँक युनियन्सने घेतली आहे. विशेष म्हणजे, हा संप प्रामुख्याने सार्वजनिक क्षेत्रातील (सरकारी) बँकांच्या कर्मचाऱ्यांनी पुकारला असल्यामुळे उद्या केवळ सरकारी बँकांचे प्रत्यक्ष कामकाजच प्रभावित होणार आहे. मात्र, या संपकाळातही ग्राहकांसाठी युपीआय (UPI), एटीएम (ATM) आणि डिजिटल बँकिंग यांसारख्या ऑनलाइन सेवा नेहमीप्रमाणे सुरळीत सुरू राहणार असल्यामुळे ग्राहकांना मोठा दिलासा मिळाला आहे.
बँक युनियनने जाहीर केलेल्या माहिती नुसार, ११ सप्टेंबर २०२६ रोजी हा देशव्यापी संप होणार असून, या दिवशी गुरुवार असल्याने सरकारी बँकांचे व्यवहार बंद राहतील. त्यानंतर लगेचच १२ आणि १३ सप्टेंबर रोजी अनुक्रमे शनिवार व रविवार आल्यामुळे बँकांच्या नियमित साप्ताहिक सुट्ट्या असणार आहेत. यानंतर सोमवार, १४ सप्टेंबर रोजी गणेश चतुर्थीच्या निमित्ताने सार्वजनिक सुट्टी असल्याने या दिवशीही बँकांचे कामकाज बंद राहणार आहे. परिणामी, ११ सप्टेंबर ते १४ सप्टेंबर या कालावधीत सलग चार दिवस बँकांचे भौतिक कामकाज पूर्णपणे बंद राहणार असल्याने नागरिकांनी आपल्या महत्त्वाच्या बँकिंग कामांची पूर्वतयारी करून ठेवणे अत्यंत आवश्यक ठरले आहे.
केवळ ११ सप्टेंबर पुरताच हा लढा मर्यादित नसून, आगामी काळात आंदोलनाची धार आणखी तीव्र करण्याचा इशारा युनियनने दिला आहे. सप्टेंबर महिन्याच्या शेवटी म्हणजेच २८, २९ आणि ३० सप्टेंबर २०२६ रोजी पुन्हा एकदा तीन दिवसांचा देशव्यापी संप पुकारण्यात आला आहे. त्यामुळे २६ आणि २७ सप्टेंबरच्या शनिवार-रविवारच्या नियमित सुट्ट्यांसह काही भागात सलग पाच दिवस बँकिंग सेवा विस्कळीत होण्याची शक्यता आहे. एवढेच नव्हे तर, यावरही सरकारकडून योग्य तोडगा न निघाल्यास आगामी २६ ऑक्टोबर २०२६ पासून बँक कर्मचाऱ्यांकडून अनिश्चित मुदतीचा बेमुदत संप पुकारला जाण्याचा इशारा देण्यात आला आहे, ज्यामुळे आगामी काळात ग्राहकांच्या अडचणीत मोठी वाढ होण्याची चिन्हे आहेत.
.jpg)
