पुणे : गणपतीचा देखावा पाहण्यासाठी होणाऱ्या गर्दीचा फायदा घेत महिलांच्या गळ्यातील सोन्याचे दागिने चोरणाऱ्या टोळीचा फरासखाना पोलिसांनी पर्दाफाश केला आहे. पोलिसांनी दोन महिला आणि एका पुरुषाला ताब्यात घेतले असून, त्यांच्याकडून २ लाख ५९ हजार १४० रुपये किमतीचे सोन्याचे दागिने आणि लोखंडी कटर जप्त करण्यात आला आहे. या कारवाईमुळे फरासखाना पोलीस ठाण्यातील दोन आणि विश्रामबाग पोलीस ठाण्यातील तीन, असे एकूण पाच चोरीचे गुन्हे उघडकीस आले आहेत.
२० सप्टेंबर २०२६ रोजी रात्री सुमारास एक वाजता फिर्यादी आपल्या नातेवाईकांसह दगडूशेठ गणपतीचा देखावा पाहण्यासाठी आले होते. छत्रपती शिवाजी महाराज रस्त्यावरील स्टॉलसमोर मोठी गर्दी होती. याच गर्दीचा फायदा घेत अज्ञात चोरट्यांनी फिर्यादी आणि त्यांच्या नातेवाईकांच्या गळ्यातील सोन्याचे मणी, वाट्या आणि कारले असा सुमारे ३८ हजार रुपयांचा ऐवज चोरून नेला. याप्रकरणी फरासखाना पोलीस ठाण्यात गुन्हा दाखल करण्यात आला होता.
गुन्ह्याचा तपास सुरू असताना पेट्रोलिंग करणारे पोलीस अंमलदार गजानन सोनुने आणि अजिम शेख यांना संशयित आरोपींबाबत गोपनीय माहिती मिळाली. या माहितीच्या आधारे पोलिसांनी कारवाई करत आरती आकाश चव्हाण (वय २२), सुवर्णा रोहित शिंदे (वय ३५) आणि रोहित उर्फ दीपक शिंदे (वय ४०) यांना ताब्यात घेतले. तिघांची चौकशी आणि झडती घेतल्यानंतर त्यांच्याकडून १८.५१० ग्रॅम वजनाचे सोन्याचे दागिने मिळून आले. तसेच चोरीसाठी वापरला जाणारा लोखंडी कटरही जप्त करण्यात आला. जप्त मुद्देमालाची एकूण किंमत २ लाख ५९ हजार १४० रुपये आहे.
आरोपींच्या चौकशीतून फरासखाना पोलीस ठाण्यातील दोन आणि विश्रामबाग पोलीस ठाण्यातील तीन, असे पाच गुन्हे उघडकीस आले आहेत. त्यामुळे गणेशोत्सवाच्या काळात गर्दीचा फायदा घेऊन दागिने चोरणाऱ्या टोळीचा शोध घेण्यात पोलिसांना यश आले आहे. ही कारवाई अपर पोलीस आयुक्त राजेश बनसोडे, पोलीस उपायुक्त ऋषिकेश रावळे, सहायक पोलीस आयुक्त सचिन हिरे आणि वरिष्ठ पोलीस निरीक्षक संदीप देशमाने यांच्या मार्गदर्शनाखाली करण्यात आली. पोलीस निरीक्षक (गुन्हे) शिवप्रकाश मुळे, पोलीस उपनिरीक्षक राजेंद्र पाटोळे तसेच पोलीस अंमलदारांच्या पथकाने ही कारवाई केली. या प्रकरणाचा पुढील तपास पोलीस अंमलदार महेश राठोड करत आहेत.
