पुणे: शहरात वाढत्या गुन्हेगारीला आणि बेकायदा शस्त्र बाळगणाऱ्या समाजकंटकांना आळा घालण्यासाठी पुणे पोलीस दलाने आपली कारवाई अधिक तीव्र केली आहे. याचाच एक भाग म्हणून पुणे गुन्हे शाखेच्या युनिट ३ च्या पथकाने सिंहगड रस्ता आणि नांदेड परिसरामध्ये यशस्वी सापळा रचत बेकायदा गावठी पिस्तूल व काडतुसे बाळगणाऱ्या दोन तरुणांच्या मुसक्या आवळल्या आहेत. या धडाकेबाज कारवाईत पोलिसांनी आरोपींकडून एक गावठी पिस्तूल, दोन जिवंत काडतुसे आणि गुन्ह्यात वापरलेली एक दुचाकी असा एकूण मुद्देमाल हस्तगत केला असून, या कारवाईमुळे परिसरातील गुन्हेगारी वर्तुळात चांगलीच खळबळ उडाली आहे.
रोहन सुरेश राठोड (वय २१, रा. नांदेड गाव, पुणे) आणि ओंकार सचिन मोरे (वय २३, रा. कोथरूड, पुणे) अशी अटक करण्यात आलेल्या दोन्ही संशयित तरुणांची नावे आहेत. प्राप्त माहिती नुसार, पुणे गुन्हे शाखेचे पथक सिंहगड रस्ता, नांदेड आणि नांदेड सिटी पोलीस ठाण्यांच्या हद्दीत प्रतिबंधात्मक गस्त घालत असताना, पोलिसांना अत्यंत गोपनीय बातमी दाराकडून महत्त्वाची टीप मिळाली. नांदेड गावातील स्मशानभूमीच्या पार्किंग परिसराजवळ रोहन राठोड हा संशयित तरुण थांबलेला असून त्याच्याकडे बेकायदा शस्त्र असल्याची खात्रीशीर माहिती मिळाल्यानंतर पोलिसांनी तातडीने सूत्रे हलवली. गुन्हे शाखेच्या पथकाने तत्परता दाखवत संबंधित ठिकाणी सापळा रचून रोहन राठोड यास शिताफीने ताब्यात घेतले. त्याची झडती घेतली असता त्याच्याकडे बेकायदा पिस्तूल आणि काडतुसे आढळून आली.
पोलिसांनी रोहन राठोडकडे पोलिसी खाक्या दाखवत कसून चौकशी केली असता, त्याने हे घातक पिस्तूल ओंकार मोरे याच्याकडून विकत घेतल्याची धक्कादायक माहिती दिली. या माहितीच्या आधारे पोलिसांनी वेगाने सूत्रे हलवत दुसरा आरोपी ओंकार मोरे यासही तातडीने बेड्या ठोकल्या. पोलिसांच्या रेकॉर्डवरील कागदपत्रे तपासली असता, ओंकार मोरे हा पोलिसांच्या नोंदीवरील सराईत गुन्हेगार असून त्याच्यावर यापूर्वीही विविध गंभीर स्वरूपाचे गुन्हे दाखल असल्याचे निष्पन्न झाले आहे. शहरात कायदा व सुव्यवस्था कायम राखण्यासाठी पोलीस आयुक्त आणि वरिष्ठ अधिकाऱ्यांच्या मार्गदर्शनाखाली ही कारवाई करण्यात आली असून, दोन्ही आरोपींना पुढील कायदेशीर व दंडात्मक कारवाईसाठी नांदेड सिटी पोलीस ठाण्याच्या ताब्यात देण्यात आले आहे. हे पिस्तूल नेमके कशासाठी आणले होते आणि यामागे आणखी कोणाचा सहभाग आहे का, याचा सखोल तपास आता पोलिसांकडून केला जात आहे.
