पुणे: पुण्यातील एका प्रसिद्ध आणि नामवंत बांधकाम व्यावसायिकाच्या नावाने आणि छायाचित्राचा गैरवापर करून त्यांच्याच कंपनीच्या अकाउंटंट मॅनेजरची दिशाभूल करत तब्बल १ कोटी ९५ लाख रुपयांना गंडा घालणाऱ्या आंतरराज्यीय सायबर गुन्हेगारीचा पुणे सायबर पोलिसांनी पर्दाफाश केला आहे. या प्रकरणाच्या सखोल तपासात या सायबर चोरट्यांचे थेट चीन कनेक्शन असल्याचे धक्कादायक तथ्य समोर आल्यामुळे एकच खळबळ उडाली आहे. या गंभीर गुन्ह्यात पोलिसांनी रोहन रामेश्वर जाधव (रा. संभाजीनगर) या पाचव्या संशयित आरोपीला अटक केली असून, यापूर्वीच या प्रकरणात चार जणांच्या मुसक्या आवळण्यात आल्या आहेत.
हा गंभीर फसवणुकीचा प्रकार गत २८ व २९ जानेवारी २०२६ दरम्यान कोथरुड परिसरातील एका बांधकाम व्यावसायिकाच्या अधिकृत कार्यालयात घडला होता. सायबर भामट्यांनी अत्यंत चलाखीने कंपनीच्या मुख्य मालकाच्या नावासह त्यांच्या खऱ्या छायाचित्राचा गैरवापर केला. कंपनीच्या तातडीच्या आणि गोपनीय कामासाठी तात्काळ पैशांची गरज असल्याचे भासवून संबंधित अकाउंटंट मॅनेजरला विविध बँक खात्यांवर मोठ्या रकमेचे ट्रान्सफर करण्यास भाग पाडण्यात आले. अशा प्रकारे भुरट्या व सुनियोजित पद्धतीने वेगवेगळ्या खात्यांवर पैसे वळवून एकूण १ कोटी ९५ लाख रुपयांची मोठी लाट मारण्यात आली. फसवणूक झाल्याचे लक्षात आल्यानंतर कंपनीच्या वतीने तातडीने सायबर पोलीस ठाण्यात धाव घेण्यात आली.
गुन्ह्याचे गांभीर्य ओळखून पुणे सायबर पोलिसांच्या विशेष पथकाने तांत्रिक तपासाची चक्रे वेगाने फिरवली. फसवणुकीची रक्कम ज्या-ज्या बँक खात्यांवर वर्ग करण्यात आली होती, त्या सर्व संबंधित बँकांशी तात्काळ ईमेलद्वारे पत्रव्यवहार करण्यात आला. या पत्रव्यवहाराच्या माध्यमातून ती बँक खाती, डेबिट कार्ड्स तसेच खात्यावरील आर्थिक व्यवहार तात्काळ लिनफ्रिज (Freeze) करण्यात आले. या संपूर्ण फसवणुकीच्या रक्कमेपैकी तब्बल ९५ लाख रुपये हे एका अॅक्सीस बँक खात्यात ट्रान्सफर झाल्याचे तपासात निष्पन्न झाले. या खात्यावरून पुढे रक्कम कुठल्या खात्यावर वळवली गेली, याचा छडा लावण्यासाठी पोलिसांनी बँक ट्रेल, संशयितांचे ईमेल आयडी आणि मोबाईल क्रमांकांचे सखोल तांत्रिक विश्लेषण केले. या तांत्रिक पुराव्यांच्या आधारे एकापाठोपाठ एक करत पोलिसांनी आतापर्यंत एकूण पाच जणांना अटक केली असून, त्यापैकी रोहन जाधव याचे थेट चीन देशाशी संधान असल्याचा सुगावा लागल्याने पोलीस यंत्रणा अधिक सतर्क झाली आहे. या कारवाईत पोलिसांनी तातडीने पावले उचलत ५० लाख २६ हजार १७१ रुपयांची रक्कम गोठवून किंवा परत मिळवून देण्यात यश मिळवले आहे, तर उर्वरित एक कोटी रुपयांच्या ट्रान्झेक्शन ट्रेलचा शोध घेण्यासाठी सध्या कसून तपास सुरू आहे.
ही धडाकेबाज आणि महत्त्वाची कारवाई पोलीस उपायुक्त विवेक मासाळ आणि सहायक पोलीस आयुक्त शुभदा संख्ये यांच्या मार्गदर्शनाखाली पुणे सायबर पोलीस ठाण्यातील अधिकारी व अंमलदारांच्या पथकाने यशस्वीरीत्या पार पाडली आहे. सायबर गुन्हेगारांचे जाळे आता आंतरराष्ट्रीय स्तरावर विस्तारत असल्याचे या प्रकरणावरून स्पष्ट होत असून, नागरिकांनी आणि व्यावसायिक संस्थांनी आर्थिक व्यवहारा संबंधीचे फोन किंवा संदेश आल्यास खात्री केल्याशिवाय कोणतेही पाऊल उचलू नये, असे आवाहन सायबर पोलिसांच्या वतीने करण्यात आले आहे.
