छत्रपती संभाजीनगर: मराठवाड्यातील उदयोन्मुख खेळाडूंना राष्ट्रीय, आंतरराष्ट्रीय तसेच ऑलिम्पिक सारख्या सर्वोच्च आणि प्रतिष्ठेच्या स्पर्धांसाठी पूर्णपणे सक्षम बनवण्यासाठी विभागातील सर्व विभागीय, जिल्हा आणि तालुका स्तरावरील क्रीडा संकुले आधुनिक, गुणवत्तापूर्ण व उच्च दर्जाच्या सुविधांनी सुसज्ज करणे अत्यंत आवश्यक असल्याचे स्पष्ट करत विभागीय आयुक्त जी. श्रीकांत यांनी प्रशासनाला महत्त्वाचे निर्देश दिले आहेत. प्रत्येक जिल्ह्याच्या भविष्यातील वाढत्या गरजा लक्षात घेऊन एक सर्वंकष विकास आराखडा तयार करावा आणि त्याचा नियमित पाठपुरावा करण्यात यावा, असे आदेश त्यांनी दिले असून क्रीडा संकुलांच्या विकासात येणाऱ्या कोणत्याही अडचणींचे विभागीय पातळीवर त्वरित निराकरण केले जाईल, अशी ग्वाहीही त्यांनी दिली आहे.
विभागीय आयुक्त कार्यालयाच्या सभागृहात मराठवाड्यातील आठही जिल्ह्यांच्या जिल्हा क्रीडा अधिकाऱ्यांची एक उच्चस्तरीय आढावा बैठक पार पडली. या महत्त्वपूर्ण बैठकीस छत्रपती संभाजीनगर क्रीडा विभागाचे विभागीय उपसंचालक शेखर पाटील, लातूर क्रीडा विभागाचे विभागीय उपसंचालक मिलिंद दीक्षित यांच्यासह जालना, बीड, धाराशिव, नांदेड, लातूर, परभणी आणि हिंगोली या सर्व जिल्ह्यांचे जिल्हा क्रीडा अधिकारी व संबंधित अधिकारी मोठ्या संख्येने उपस्थित होते. या बैठकीत क्रीडा संकुलांचे अद्ययावतीकरण, आवश्यक जमिनीची उपलब्धता, निधीचा योग्य विनियोग आणि अतिरिक्त निधीची गरज यांसारख्या विविध महत्त्वाच्या मुद्यांवर सविस्तर चर्चा करण्यात आली.
प्रत्येक जिल्ह्यात विविध खेळांमधील उत्कृष्ट खेळाडू घडवण्यासाठी स्थानिक स्तरावर नियमित क्रीडा स्पर्धांचे आयोजन होणे गरजेचे आहे, असे सांगत आयुक्तांनी ज्या जिल्ह्यांत अद्याप आंतरराष्ट्रीय दर्जाचे सिंथेटिक ट्रॅक उपलब्ध नाहीत, त्यांनी ते उभारण्यासाठी तातडीने विकास आराखडा सादर करावा, असे सांगितले. विकासाचे नियोजन करताना कृत्रिम बुद्धिमत्तेचा (एआय) प्रभावी वापर करून कामांचे प्राधान्यक्रम ठरवावेत, तसेच वास्तुकलेतील उच्च दर्जाचे आराखडे तयार करून आगामी दहा दिवसांत प्रस्ताव सादर करावेत, असे निर्देश देण्यात आले. प्रगतीपथावर असलेल्या कामांची पारदर्शकता आणि गुणवत्ता सुनिश्चित करण्यासाठी ड्रोनद्वारे पाहणी करून त्याचे छायाचित्र व व्हिडिओ संकलित करण्याचे आदेशही यावेळी देण्यात आले.
क्रीडा संकुलांच्या परिसराची स्वच्छता आणि देखभाल यावर विशेष भर देत विभागीय आयुक्तांनी एक महत्त्वपूर्ण निर्णय जाहीर केला आहे. सर्व शासकीय कार्यालयांच्या धर्तीवर आता जिल्हा व तालुका स्तरावरील क्रीडा संकुल परिसरातही दर सोमवारी सकाळी १० ते ११ या वेळेत विशेष स्वच्छता मोहीम राबवली जाणार असून, यात अधिकारी व कर्मचाऱ्यांनी सक्रिय सहभाग घेणे बंधनकारक करण्यात आले आहे. तसेच स्वच्छतागृहांची नियमित स्वच्छता कायम राखण्यासाठी आवश्यक मनुष्यबळ नेमून त्यांना योग्य मानधन मिळण्याची खातरजमा करावी आणि परिसरातील हिरवळ टिकवण्यासाठी तसेच आवश्यकते नुसार स्वतंत्र पाणीशुद्धीकरण केंद्र उभारण्याचे निर्देश त्यांनी दिले. मराठवाड्यातून क्रीडा क्षेत्रातील हिरे घडवण्यासाठी सर्व यंत्रणांनी उत्तम समन्वय साधून वेळेत कामे पूर्ण करावीत, असे आवाहन त्यांनी केले आहे.
