प्रशासनाची परवानगी नाही, तरी आंदोलनावर ठाम; लक्ष्मण हाके मुंबईच्या दिशेने

पुणे: ओबीसी आरक्षणाच्या आणि इतर मागण्यांच्या मुद्द्यावरून आता ओबीसी नेत्यांमध्येच मतभेद असल्याचे स्पष्ट झाले आहे. एकीकडे राष्ट्रीय ओबीसी महासंघाने या आंदोलनात सहभागी न होण्याचा निर्णय घेत सध्या आमच्या आरक्षणाला कोणताही धक्का लागलेला नाही, अशी भूमिका घेतली आहे; तर दुसरीकडे, आक्रमक ओबीसी नेते लक्ष्मण हाके हे प्रशासनाने परवानगी नाकारली तरी कोणत्याही परिस्थितीत मुंबईत जाऊन आंदोलन करण्यावर ठाम आहेत. या दोन भिन्न भूमिकांमुळे राजकीय आणि सामाजिक वर्तुळात मोठी चर्चा रंगली आहे.

       लक्ष्मण हाके यांनी ओबीसी समाजाच्या प्रश्नांवर आक्रमक पवित्रा घेत मुंबईच्या दिशेने धडक देण्याची तयारी दर्शवली आहे. प्रशासनाकडून या आंदोलनाला अद्याप अधिकृत परवानगी मिळालेली नाही, मात्र यावर तीव्र संताप व्यक्त करत हाके यांनी, "आमचे कोणी ऐकत नाही, मग आम्ही का ऐकायचे? परवानगी असो वा नसो, आम्ही मुंबईत जाणारच," असा स्पष्ट इशारा दिला आहे. त्यांच्या या भूमिकेमुळे शासन आणि प्रशासना समोर एक नवीन पेच निर्माण होण्याची शक्यता वर्तवली जात आहे.

      दुसरीकडे, राष्ट्रीय ओबीसी महासंघाने या आंदोलनापासून स्वतःला दूर ठेवले आहे. महासंघाचे अध्यक्ष बबनराव तायवाडे यांनी स्पष्ट केले आहे की, सध्याच्या घडीला ओबीसी आरक्षणाला कोणताही धोका निर्माण झालेला नाही, त्यामुळे या आंदोलनात महासंघ सहभागी होणार नाही. महासंघाची ही भूमिका 'वेट अँड वॉच'ची असल्याचे दिसून येत आहे. एकीकडे प्रमुख संघटना या आंदोलनात सहभागी होण्यास तयार नसली, तरी लक्ष्मण हाके आपल्या भूमिकेवर ठाम राहिल्यामुळे ओबीसी नेत्यांमधील हा अंतर्गत कलह चव्हाट्यावर आला आहे. या आंदोलनामुळे आगामी काळात राज्यातील राजकीय वातावरण आणखी तापण्याची चिन्हे आहेत.