पुणे: अमली पदार्थांच्या वाढत्या गैरव्यवहारांमुळे वारंवार चर्चेत येणाऱ्या पुणे शहरातील कोंढवा परिसरात पोलिसांनी मोठी कारवाई करत अवैध नशेच्या साहित्यावर मोठा प्रहार केला आहे. कोंढवा पोलिसांनी स्वतंत्रपणे केलेल्या दोन वेगवेगळ्या कारवायांमध्ये तब्बल ८ लाखांहून अधिक मूल्याचा हायड्रोपोनिक गांजा आणि मेफेड्रोन (एमडी) या घातक अंमली पदार्थांसह दोन जणांना बेड्या ठोकल्या आहेत. या दोन्ही आरोपींवर एनडीपीएस कायद्यांतर्गत (NDPS Act) कठोर कायदेशीर कारवाई करण्यात आली आहे.
पहिल्या कारवाईत, कोंढवा पोलीस ठाण्याचे तपास पथक गस्तीवर असताना अजमेरा पार्क परिसरात एक व्यक्ती दुचाकीवर संशयास्पद रित्या उभी असल्याचे निदर्शनास आले. पोलिसांनी तात्काळ सूत्रे हलवत अमीर अकबर शेख (वय ३६, रा. एल के अपार्टमेंट, अजमेरा पार्क, कोंढवा खुर्द) याला ताब्यात घेतले. त्याची झडती घेतली असता त्याच्याकडे तब्बल ५ लाख २१ हजार रुपयांचा १४९ ग्रॅम हायड्रोपोनिक गांजा आढळून आला. पोलिसांनी या कारवाईत अंमली पदार्थासह ३,३०० रुपये रोख, २५ हजार रुपयांची दुचाकी आणि दोन इलेक्ट्रॉनिक वजनकाटे असा एकूण ५ लाख ४९ हजार ८०० रुपयांचा मुद्देमाल जप्त केला.
दुसऱ्या एका कारवाईत, कोंढवा परिसरातील पॅराडाईज इन लॉजमध्ये एक तरुण अंमली पदार्थाचे सेवन करत असल्याची गोपनीय माहिती पोलीस अंमलदार केशव हिरवे यांना मिळाली होती. या खात्रीशीर माहितीच्या आधारे पोलिसांच्या पथकाने संबंधित लॉजवर अचानक छापा टाकला आणि अजीम सलीम शेख (वय ३७, रा. काशेवाडी) याला ताब्यात घेतले. त्याच्या अंगझडतीत २ लाख ४२ हजार ६०० रुपयांचे १२ ग्रॅम मॅफेड्रोन (एमडी), ५,५०० रुपये रोख, दोन मोबाईल आणि १५ इंजेक्शन सिरींज असा एकूण २ लाख ६४ हजार रुपयांचा माल जप्त करण्यात आला.
शहरात सातत्याने डोके वर काढणाऱ्या अंमली पदार्थांच्या तस्करीला आळा घालण्यासाठी पोलिसांची ही कामगिरी अत्यंत महत्त्वाची मानली जात आहे. वरिष्ठ पोलीस निरीक्षक संतोष खेतमाळस, पोलीस निरीक्षक प्रशांत मंडले आणि संतोष चौधरी यांच्या मार्गदर्शनाखाली सहायक पोलीस निरीक्षक महेंद्र डोके, पोलीस उपनिरीक्षक रवींद्र गावडे, सागर पवार यांच्यासह पोलीस पथकाने ही धडक कारवाई पार पाडली. या प्रकरणाचा पुढील सखोल तपास पोलीस करत असून, या अमली पदार्थ तस्करीच्या जाळ्यात आणखी कोणा कोणाचा सहभाग आहे, याचा शोध घेतला जात आहे.
.jpg)
.jpg)
.jpg)
