पुणे जिल्ह्यातील सार्वजनिक बांधकामांचा सुनेत्रा पवारांकडून आढावा; वेळेत कामे पूर्ण करण्याचे निर्देश

पुणे: पुणे जिल्ह्यामध्ये सार्वजनिक बांधकाम विभागामार्फत (PWD) हाती घेण्यात आलेल्या विविध विकास प्रकल्पांची कामे आणि शासकीय इमारतींच्या बांधकामांच्या सद्यःस्थितीचा उपमुख्यमंत्री सुनेत्रा अजित पवार यांनी एका उच्चस्तरीय बैठकीत सविस्तर आढावा घेतला. विभागीय आयुक्त कार्यालयाच्या सभागृहात पार पडलेल्या या महत्त्वपूर्ण बैठकीत प्रकल्पांच्या गतीसह गुणवत्तेबाबत प्रशासनाला स्पष्ट आणि कडक निर्देश देण्यात आले असून, रखडलेल्या कामांना गती देण्याचे आदेश देण्यात आले आहेत.

       या आढावा बैठकीस उपमुख्यमंत्र्यांचे सचिव डॉ. राजेश देशमुख, जिल्हाधिकारी जितेंद्र डुडी, सार्वजनिक बांधकाम विभागाचे मुख्य अभियंता अनिल पवार यांच्यासह विविध विभागांचे वरिष्ठ अधिकारी आणि अभियंते मोठ्या संख्येने उपस्थित होते. नागरिकांना दैनंदिन जीवनात आवश्यक असणाऱ्या सर्व प्रकारच्या मूलभूत सोयी-सुविधा आणि नागरिक-केंद्री प्रकल्प विहित वेळेत उपलब्ध करून देणे ही शासनाची सर्वोच्च प्राथमिकता असल्याचे यावेळी प्रकर्षाने सांगण्यात आले. सार्वजनिक हिताचे हे सर्व प्रकल्प अत्यंत महत्त्वाचे असून, जनतेला त्याचा जलद लाभ मिळायला हवा, असे मत प्रशासनाकडून व्यक्त करण्यात आले.

      बैठकी दरम्यान बोलताना उपमुख्यमंत्री सुनेत्रा अजित पवार यांनी काही महत्त्वाचे प्रकल्प हे आदरणीय ‘दादां’चे अत्यंत जिव्हाळ्याचे आणि ‘ड्रीम प्रोजेक्ट्स’ असल्याचे नमूद केले. त्यामुळे या सर्व प्रकल्पांची कामे केवळ कागदावर किंवा विलंबाने पूर्ण न करता, ठरवून दिलेल्या कालमर्यादेत, अत्यंत दर्जेदार आणि उच्च गुणवत्तेच्या मानदंकांनुसारच पूर्ण झाली पाहिजेत, याची गांभीर्याने नोंद घेत अधिकाऱ्यांनी व्यक्तिगत लक्ष घालावे, असे सक्त निर्देश त्यांनी दिले. प्रशासकीय कामांमध्ये कोणतीही शीथलता किंवा दिरंगाई खपवून घेतली जाणार नाही, असा इशाराही त्यांनी अप्रत्यक्षपणे दिला.

       या प्रकल्पांच्या प्रत्यक्ष प्रगतीचा लेखाजोखा घेण्यासाठी आपण स्वतः लवकरच विविध प्रकल्पांच्या ठिकाणी प्रत्यक्ष भेट देऊन पाहणी करणार असल्याचे उपमुख्यमंत्री श्रीमती पवार यांनी यावेळी जाहीर केले. तसेच, या सर्व विकासकामांच्या प्रगतीचा नियमित आणि काटेकोर आढावा घेतला जाईल, असे सांगत अधिकाऱ्यांनी समन्वयाने काम पूर्ण करावे, असे आवाहन त्यांनी केले. या उच्चस्तरीय बैठकीस अधीक्षक अभियंता भारतकुमार बाविस्कर, कार्यकारी अभियंता अमोल पवार, उज्ज्वला घावटे, प्रशांत खैरमोडे, उपअभियंता अनिल बडे, शाखा अभियंता अनिल काकडे आणि नवनाथ शेळके यांच्यासह बांधकाम विभागाचे इतर प्रमुख अधिकारी उपस्थित होते.