पिंपरी: आगामी दहीहंडी आणि गणेशोत्सवाच्या पार्श्वभूमीवर पिंपरी-चिंचवड पोलीस आयुक्तालयाने उत्सव काळात कायदा व सुव्यवस्था अबाधित ठेवण्यासाठी अत्यंत कडक पवित्रा घेतला आहे. दहीहंडीच्या कार्यक्रमांमध्ये कोणत्याही प्रकारच्या अश्लील नृत्याला, आक्षेपार्ह हावभावांना किंवा सामाजिक स्वास्थ्याला बाधा पोहोचवणाऱ्या प्रकारांना थारा दिला जाणार नाही, असा कडक दम पोलीस आयुक्त विनयकुमार चौबे यांनी दिला आहे. उत्सवाच्या नावाखाली नियमभंग करणाऱ्या किंवा नागरिकांच्या तक्रारी प्राप्त होणाऱ्या संबंधित आयोजक मंडळांवर थेट आणि कठोर कायदेशीर कारवाई केली जाईल, असा इशारा आयुक्तांनी स्पष्ट शब्दांत दिला आहे.
पिंपरी-चिंचवड पोलीस आयुक्तालयाच्या वतीने आकुर्डी येथील प्रसिद्ध ग. दि. माडगूळकर सभागृहात दिमाखदार वातावरणात पार पडलेल्या ‘श्री मोरया पुरस्कार २०२५’ पारितोषिक वितरण सोहळ्यात ते बोलत होते. पोलीस आयुक्त विनयकुमार चौबे यांच्या कल्पनेतून गेल्या चार वर्षांपासून हा नाविन्य पूर्ण उपक्रम सातत्याने राबविण्यात येत आहे. यंदाच्या सोहळ्यात उत्कृष्ट आरास, आकर्षक देखावे सादर करणाऱ्या आणि अत्यंत शिस्तबद्ध व उल्लेखनीय पद्धतीने मिरवणूक पार पाडणाऱ्या १४ सार्वजनिक गणेश मंडळांना मानाची ट्रॉफी व पुरस्कार देऊन गौरविण्यात आले. या उच्चस्तरीय कार्यक्रमास पिंपरी-चिंचवड महानगरपालिकेचे आयुक्त डॉ. विजय सूर्यवंशी, पोलीस सहआयुक्त डॉ. शशिकांत महावरकर, अपर पोलीस आयुक्त सारंग आवाड, विविध परिमंडळांचे पोलीस उपायुक्त, सहाय्यक पोलीस आयुक्त, वरिष्ठ पोलीस अधिकारी यांच्यासह विविध गणेश मंडळांचे सुमारे एक हजार पदाधिकारी व कार्यकर्ते मोठ्या संख्येने उपस्थित होते.
या सोहळ्यात उत्कृष्ट ठरलेल्या सार्वजनिक गणेश मंडळांचा गौरव करण्यात आला, ज्यामध्ये पोलीस आयुक्तालय स्तरावर चाकणच्या मार्केटयार्ड येथील मयूर मित्र मंडळाने प्रथम क्रमांक पटकावत प्रतिष्ठेचा ‘श्री मोरया फिरता करंडक’ आपल्या नावावर केला. याच स्तरावर पिंपळगाव येथील सुवर्ण मित्र मंडळ, क्रीडा व कला मंचाने द्वितीय तर बावधनच्या सिद्धीचा गणपती महिला मंडळाने तृतीय स्थान पटकावले. याशिवाय परिमंडळनिहाय उत्कृष्ट ठरलेल्या मंडळांमध्ये परिमंडळ-१ मधून चिंचवडच्या एस.के.एफ. गणेश उत्सव मंडळाने प्रथम, सांगवीच्या भैरवनाथ मित्र मंडळाने द्वितीय आणि पिंपरीच्या स्वराज्य मित्र मंडळाने तृतीय क्रमांक मिळवला. परिमंडळ-२ मधून थेरगावच्या सम्राट मित्र मंडळाने प्रथम, शिरगावच्या शिवतेज मित्र मंडळाने द्वितीय तर तळेगाव दाभाडेच्या गणेश तरुण मित्र मंडळाने तृतीय स्थान प्राप्त केले. परिमंडळ-३ मधून चाकणच्या नवयुग मित्र मंडळाने प्रथम तर चिखलीच्या जय बजरंग मित्र मंडळाने तृतीय क्रमांक पटकावला. तसेच, आदर्श देखाव्यासाठी थेरगाव-वाकडच्या विशाल मित्र मंडळाला आणि आदर्श मिरवणुकीसाठी रावेतच्या श्री सिद्धपती मित्र मंडळाला विशेष पुरस्काराने सन्मानित करण्यात आले.
शहरात यंदा दहीहंडीच्या दिवशी मोठी गर्दी होण्याची शक्यता वर्तवली जात असून, या पार्श्वभूमीवर पोलिसांनी उत्सवातील प्रत्येक हालचालींवर विशेष लक्ष केंद्रित केले आहे. नागरिकांकडून कोणतीही तक्रार प्राप्त झाल्यास पोलीस यंत्रणा तात्काळ आणि अत्यंत गांभीर्याने कारवाई करेल, असे स्पष्ट करत आयुक्तांनी सर्वांनी नियमांचे पालन करून प्रशासनाला पूर्ण सहकार्य करावे, असे आवाहन केले आहे. संस्कृतीचे जतन करत आणि सर्वसामान्यांना कोणताही त्रास होणार नाही अशा पद्धतीने शांततेत व उत्साहात उत्सव पार पाडावेत, अशी ठाम भूमिका पोलीस प्रशासनाकडून घेण्यात आली आहे.
.jpg)
.webp)
