पुण्यात दहीहंडी उत्सवासाठी वाहतुकीत बदल; ४-५ सप्टेंबरला ‘हे’ रस्ते बंद

पुणे: आगामी दहीहंडी उत्सवाच्या पार्श्वभूमीवर पुणे शहर आणि परिसरातील वाहतूक व्यवस्थेत मोठे फेरबदल करण्यात आले असून, आगामी ४ आणि ५ सप्टेंबर रोजी शहरातील मध्यवर्ती भागासह विविध महत्त्वाच्या मार्गांवर कडक वाहतूक नियमन लागू असणार आहे. उत्सवा दरम्यान थरांच्या उत्सवासाठी जमणारी गर्दी आणि गोविंदा पथकांची रेलचेल लक्षात घेता, शहरात वाहतूक कोंडी होऊ नये यासाठी पुणे वाहतूक पोलिसांनी विशेष नियोजन केले आहे. या दोन दिवसांत काही प्रमुख रस्ते पूर्णपणे वाहतुकीसाठी बंद ठेवण्यात येणार असून, काही मार्गांवरील वाहतूक तात्काळ पर्यायी मार्गांकडे वळवली जाणार आहे. प्रत्यक्ष परिस्थिती नुसार गर्दीचे नियंत्रण करण्यासाठी वाहतूक पोलिसांना आवश्यकतेनुसार तातडीने निर्णय घेण्याचे अधिकार देण्यात आले आहेत.

        उत्सवाच्या नियोजना नुसार, ४ सप्टेंबर रोजी सायंकाळी ४ वाजल्यापासून फडके हौद परिसरात वाहतूक बंद किंवा विशेष नियमन केले जाणार आहे. याचδरम्यान जिजामाता चौक, सोन्या मारुती चौक आणि गणेश रोड परिसरातील वाहतूक देखील परिस्थितीनुसार पर्यायी मार्गांनी वळवली जाईल. या भागातून नियमित ये-जा करणाऱ्या वाहनचालकांनी प्रवासादरम्यान कोणतीही गैरसोय टाळण्यासाठी पर्यायी मार्गांचा अवलंब करावा, असे सुचवण्यात आले आहे. यानंतर उत्सवाच्या दुसऱ्या दिवशी, म्हणजेच ५ सप्टेंबर रोजी सायंकाळी ४ वाजल्यापासून महत्त्वाचा असणारा शिवरकर रोड सर्वसामान्यांच्या वाहतुकीसाठी पूर्णपणे बंद ठेवण्यात येणार आहे. या बंद मार्गावरील वाहतूक सुरळीत ठेवण्यासाठी ती संविधान चौक, साळुंखे विहार रोड आणि फ्लॉवर व्हॅली लेन या पर्यायी मार्गांकडे वळवण्यात आली आहे.

       केवळ मध्यवर्ती भागच नव्हे, तर लष्कर, वारजे, समर्थ, बंडगार्डन आणि काळेपडळ या प्रमुख अंतर्गत वाहतूक विभागांच्या हद्दीतही सुरक्षिततेच्या कारणास्तव विशेष नियमन लागू करण्यात आले आहे. या भागांमध्ये गर्दीच्या तीव्रतेनुसार काही मार्गांवर एकेरी वाहतूक लागू केली जाईल, तर काही ठिकाणी रस्ते पूर्णपणे बंद करून वाहने इतर मार्गांवर वळवली जातील. या उत्सवाच्या काळात नागरिकांनी घराबाहेर पडताना शक्यतो खाजगी वाहनांचा वापर टाळावा आणि सार्वजनिक वाहतूक व्यवस्थेला प्राधान्य द्यावे, असे आवाहन करण्यात आले आहे. घराबाहेर पडण्यापूर्वी बंद असलेले रस्ते आणि उपलब्ध पर्यायी मार्गांची खात्री करून घ्यावी, तसेच रस्त्यावर तैनात असणाऱ्या वाहतूक पोलिसांच्या सूचनांचे तंतोतंत पालन करून प्रशासनाला सहकार्य करावे, अशी विनंती वाहतूक शाखेचे पोलीस उपायुक्त डॉ. संदीप भाजीभाकरे यांनी पुणेकरांना केली आहे.