ई-पीक पाहणीचा अतिताण: तलाठ्यांचा जीव थोडक्यात बचावला;

दहिवडी प्रतिनिधी,ता.२५:

प्रशासकीय कामांचा वाढता ताण, रात्री उशिरापर्यंत जुने रेकॉर्ड शोधण्याचे आदेश आणि भल्या पहाटे बोलावलेल्या बैठका यांमुळे महसूल प्रशासनातील तलाठ्यांची प्रचंड पिळवणूक होत असून, हा ताण थेट त्यांच्या जीवावर बेतत असल्याचे समोर आले आहे. आज सकाळी ई-पीक पाहणीच्या तातडीने बोलावलेल्या बैठकीला जाताना गोंदवले खुर्द नजीक झालेल्या भीषण अपघातात तलाठी अजित भोसले गंभीर जखमी झाले आहेत.

महसूल मंत्र्यांच्या आदेशानुसार जुने रेकॉर्ड शोधण्याचे काम रात्री उशिरापर्यंत सुरू असतानाच, आज सकाळी सात वाजताच म्हसवड येथे ई-पीक पाहणीची तातडीची बैठक बोलावण्यात आली होती. या बैठकीला घाईघाईत जाताना गोंदवले खुर्दजवळ तलाठी अजित भोसले यांच्या मोटारसायकलचा अपघात झाला. त्यांना तातडीने म्हसवड येथील डॉ. दोलतडे यांच्या रुग्णालयात दाखल करण्यात आले. तेथे त्यांच्यावर तातडीने शस्त्रक्रिया करण्यात आली असून वेळेत उपचार मिळाल्यामुळे त्यांचा जीव थोडक्यात वाचला आहे.

ई-पीक पाहणीच्या कामासाठी प्रशासनाने सहाय्यकांची नियुक्ती केली होती. मात्र, वेळेवर वेतन न मिळाल्याने अनेक सहाय्यकांनी काम सोडून दिले आहे. अशा स्थितीत "सहाय्यक न मिळाल्यास संपूर्ण ई-पीक पाहणी तलाठ्यांनाच करावी लागेल," असा सज्जड दम महसूल प्रशासनाकडून दिला जात आहे. त्यामुळे तलाठ्यांवर कामाचा अथांग ताण वाढला आहे.

सततच्या 'अभियानां'मुळे कर्मचारी मेटाकुटीला

कोणताही राष्ट्रीय सण, उत्सव असो वा एखाद्या राजकीय नेत्याचा वाढदिवस, प्रत्येक प्रसंगी तलाठ्यांना नवीन 'अभियान' राबवण्याचे निर्देश दिले जातात. सततच्या या मोहिमांमुळे तलाठी वर्ग पूर्णपणे मेटाकुटीला आला आहे. "ई-पीक पाहणीच्या नावाखाली तलाठ्यांचा बळी घेणार का?" असा जळजळीत सवाल आता सामान्य नागरिकांमधून विचारला जात आहे.

प्रशासनाने तात्काळ खाजगी कामगारांची मदत उपलब्ध करून द्यावी किंवा नवीन नोकरभरती करून तलाठी कर्मचाऱ्यांवरील कामाचा ताण कमी करावा, अशी जोरदार मागणी नागरिकांकडून केली

जात आहे.