मुंबईतील १९९ अतिरिक्त शिक्षकांना दिलासा; तातडीने समायोजनाचे आदेश

मुंबई: मुंबईतील विविध शाळांमध्ये अतिरिक्त ठरलेल्या शिक्षकां पैकी अद्याप प्रलंबित असलेल्या १९९ शिक्षकांच्या समायोजनाची प्रक्रिया तात्काळ पूर्ण करण्याचे निर्देश शालेय शिक्षण मंत्री दादाजी भुसे यांनी दिले आहेत. या शिक्षकांची पात्रता व निकष तपासून त्यांचे महानगरपालिकेच्या शाळांमध्ये किंवा रात्रशाळांमध्ये लवकरात लवकर समावेशन करावे, असे सांगतानाच विद्यार्थ्यांना गुणवत्तापूर्ण शिक्षण मिळवून देण्यासाठी सर्व यंत्रणांनी समर्पित भावनेने एकत्र काम करण्याचे आवाहन त्यांनी केले आहे. विधान परिषद सदस्य ज. मो. अभ्यंकर यांनी यासंदर्भात दिलेल्या निवेदनावर मंत्रालयात एका उच्चस्तरीय बैठकीचे आयोजन करण्यात आले होते, ज्यामध्ये शालेय शिक्षण आयुक्त सचिंद्रप्रताप सिंह, माध्यमिक संचालक डॉ. महेश पालकर आणि प्राथमिक संचालक शरद गोसावी यांच्यासह वरिष्ठ अधिकारी ऑनलाईन उपस्थित होते.

        या महत्त्वपूर्ण बैठकीत केवळ अतिरिक्त शिक्षकांच्या समायोजनावरच नव्हे, तर शिक्षक वर्गाच्या प्रलंबित असलेल्या विविध महत्त्वपूर्ण मागण्यांवरही सखोल चर्चा करण्यात आली. मुंबईतील रात्रशाळांमध्ये शिक्षकांची आवश्यकता तपासून संख्या वाढवण्याबाबत विचार करावा, रात्रशाळांमधील दुबार शिक्षकांना त्यांनी प्रत्यक्ष केलेल्या कामाच्या आधारे त्यांची प्रलंबित वेतने अदा करावीत आणि शिक्षकांची दीर्घकाळ प्रलंबित असलेली वैद्यकीय देयके योग्य निकष लावून मार्गी लावावीत, असे आदेश मंत्र्यांनी दिले. तसेच, प्राथमिक शाळांचे मुख्याध्यापक आणि माध्यमिक शाळांच्या शिक्षकांच्या संचित अर्जित रजेचे रोखीकरण (Encashment of Earned Leave) करण्यासाठी आवश्यकते नुसार सेवा नियमांमध्ये योग्य ते बदल करण्याचे निर्देशही त्यांनी यावेळी संबंधित विभागाला दिले.

          शैक्षणिक वर्षाच्या सत्रामध्येच सेवानिवृत्त झालेल्या कर्मचाऱ्यांना सत्र संपेपर्यंत पुनर्नियुक्ती दिल्यास त्यांचे वेतन ‘शालार्थ प्रणाली’मधून (Shalarth System) देण्याबाबत तांत्रिक अडचणी निर्माण होतात. अशा प्रकारची किती प्रकरणे सध्या प्रलंबित आहेत, याचा सविस्तर ताळेबंद तपासून संबंधित कर्मचाऱ्यांना मानधन उपलब्ध करून द्यावे, अशी सूचनाही त्यांनी केली. भविष्यात अशा प्रकारच्या समस्या टाळण्यासाठी यापुढे सेवानिवृत्त होणाऱ्या शिक्षक व कर्मचाऱ्यांच्या जागेवर आधीपासूनच पूर्व नियोजन करून पर्यायी व्यवस्था उभी करावी, जेणेकरून विद्यार्थ्यांच्या शिक्षणात खंड पडणार नाही, असे स्पष्ट निर्देश शालेय शिक्षण मंत्र्यांनी दिले आहेत.