पुण्यात ई-बाइक टॅक्सी सुरू होण्याची शक्यता; कंपन्यांचे आरटीओकडे अर्ज

पुणे: परिवहन विभागाने ॲप-आधारित प्रवासी वाहतूक करणाऱ्या कंपन्यांसाठी नवीन ‘ॲग्रीगेटर पॉलिसी’ लागू केल्यानंतर, आता पुणे शहरात ‘ई-बाइक टॅक्सी’ सेवा सुरू होण्याच्या हालचालींना मोठा वेग आला आहे. देशातील प्रमुख ऑनलाईन प्रवासी वाहतूक सेवा पुरवणाऱ्या उबर (Uber) आणि रॅपिडो (Rapido) या कंपन्यांनी पुणे प्रादेशिक परिवहन कार्यालयाकडे (RTO) अधिकृतपणे ई-बाइक टॅक्सी सेवा सुरू करण्यासाठी परवानगी मागितली आहे. या अर्जांनंतर आरटीओ प्रशासनाने तातडीने पावले उचलत सुरक्षितता आणि धोरण पालनाच्या छाननीसाठी एका विशेष पथकाची स्थापना करण्याचा निर्णय घेतला आहे.

        कंपन्यांकडून प्राप्त झालेल्या अर्जांवर योग्य कार्यवाही करण्यासाठी पुणे आरटीओ प्रशासनाकडून एक विशेष तपासणी पथक नेमण्यात येणार आहे. हे पथक संबंधित कंपन्यांकडून शासनाच्या ॲग्रीगेटर धोरणातील सर्व मार्गदर्शक तत्त्वे आणि नियमांचे काटेकोरपणे पालन केले जाणार आहे किंवा नाही, याची सविस्तर पाहणी करणार आहे. प्रवाशांची सुरक्षा, ई-बाइकची तांत्रिक स्थिती, आवश्यक परवाने आणि इतर कायदेशीर बाबींची या पथकाद्वारे कसून पडताळणी केली जाईल. तसेच, या कंपन्यांच्या पुण्यातील कार्यालयांना प्रत्यक्ष भेट देऊन आवश्यक त्या सर्व कागदपत्रांची आणि माहितीची खातरजमा केली जाणार आहे, असे प्रादेशिक परिवहन अधिकारी अर्चना गायकवाड यांनी स्पष्ट केले.

          आरटीओ प्रशासनाकडून ही सर्व तपासणी प्रक्रिया पूर्ण झाल्यानंतर एक सविस्तर अहवाल तयार करून तो राज्य परिवहन प्राधिकरणाकडे (एसटीए - STA) सुपूर्त करण्यात येणार आहे. या अहवालातील निष्कर्षांवर सखोल चर्चा झाल्यानंतरच ‘एसटीए’कडून पुण्यात उबर आणि रॅपिडोला ई-बाइक टॅक्सीचा व्यवसाय प्रत्यक्ष सुरू करण्यासाठी अंतिम मंजुरी द्यायची की नाही, याबाबतचा अंतिम निर्णय घेतला जाईल. या प्रकरणावर आता संपूर्ण वाहतूक क्षेत्राचे लक्ष लागून असून, मंजुरी मिळाल्यास पुणेकरांना शहरांतर्गत प्रवासासाठी आणखी एक जलद, पर्यावरणपूरक आणि सुलभ पर्याय उपलब्ध होण्याचा मार्ग मोकळा होणार आहे.