भाजपच्या बालेकिल्ल्यात प्रशांत किशोरांची मोठी मुसंडी मारत ऐतिहासिक विजय

पटना: बिहारच्या राजकारणाचे संपूर्ण देशाचे लक्ष लागून राहिलेल्या अत्यंत महत्त्वाच्या बांकीपूर विधानसभा पोटनिवडणुकीत जनसुराज पार्टीचे संस्थापक प्रशांत किशोर यांनी मोठी राजकीय उलथापालथ करत आघाडी घेतली आहे. मतमोजणीच्या १५व्या फेरीनंतर प्रशांत किशोर यांनी भाजपचे उमेदवार नीरज सिन्हा यांच्यावर ८,२०२ मते घेत निर्णायक आघाडी निर्माण केली आहे. सलग ३० वर्षे भारतीय जनता पक्षाचा गड मानल्या जाणाऱ्या या मतदारसंघात जनसुराजच्या या मुसंडीमुळे बिहारच्या राजकीय वर्तुळात मोठी खळबळ उडाली आहे.

हाती आलेल्या आकडेवारीनुसार, मतमोजणीच्या १५ व्या फेरीत जनसुराजचे प्रशांत किशोर आघाडीवर असून, भाजपचे नीरज सिन्हा २१,५५० मते मिळवून दुसऱ्या स्थानावर आहेत. तर राष्ट्रीय जनता दल (आरजेडी) च्या रेखा गुप्ता ६,७५५ मते मिळवून तिसऱ्या स्थानावर आहेत. मतमोजणीच्या सुरुवातीपासूनच जनसुराजने आपली पकड मजबूत ठेवल्यामुळे पक्षाच्या कार्यकर्त्यांमध्ये आनंदाचे आणि उत्साहाचे वातावरण पाहायला मिळत आहे. आघाडी मिळवल्यानंतर प्रतिक्रिया देताना प्रशांत किशोर यांनी आत्मविश्वासाने सांगितले की, "आमचा विजय आधीच निश्चित झाला आहे." त्यांच्या या वक्तव्यानंतर कार्यकर्त्यांनी मोठा जल्लोष सुरू केला असून सोशल मीडियावरही जनसुराजची चर्चा रंगली आहे.

विशेष म्हणजे, कायस्थ समाजाचे वर्चस्व असलेल्या भागांमध्येही भाजपला पिछाडीचा सामना करावा लागत आहे, तर मुस्लिमबहुल भागांतील मतमोजणी अद्याप बाकी असल्याने अंतिम निकालाबाबतची उत्सुकता आणखी वाढली आहे. या पोटनिवडणुकीसाठी १४ टेबलांवर एकूण ३१ फेऱ्यांमध्ये मतमोजणी सुरू असून, सुरक्षेच्या दृष्टीने कडक बंदोबस्त ठेवण्यात आला असून ड्रोनद्वारे सतत देखरेख केली जात आहे. या निवडणुकीच्या रिंगणात प्रशांत किशोर, नीरज सिन्हा आणि रेखा गुप्ता यांच्यासह एकूण २५ उमेदवार नशीब आजमावत आहेत.

बांकीपूर विधानसभा मतदारसंघ हा गेल्या तीन दशकांपासून (१९९५ पासून) भाजपचा अत्यंत सुरक्षित आणि मजबूत बालेकिल्ला मानला जातो. याआधी या जागेवर नवीन किशोर प्रसाद सिन्हा आणि त्यानंतर त्यांचे पुत्र नितीन नवीन यांनी सातत्याने प्रतिनिधित्व केले होते. मात्र, नितीन नवीन राज्यसभेवर निवडले गेल्यानंतर त्यांनी आपल्या आमदारकीचा राजीनामा दिल्याने ही पोटनिवडणूक लागली.

दरम्यान, या सुरुवातीच्या निकालांवरून राजकीय प्रतिक्रिया उमटू लागल्या असून, भाजप पिछाडीवर असल्याच्या पार्श्वभूमीवर आरजेडी नेते तेज प्रताप यादव यांनी हा जनतेच्या रोषाचा आणि निर्णयाचा विजय असल्याचे म्हटले आहे. बांकीपूर पोटनिवडणुकीचे हे कल केवळ एका जागेपुरते मर्यादित नसून, आगामी काळातील बिहारच्या बदलत्या राजकीय समीकरणांवर याचे दूरगामी परिणाम होणार असल्याचे स्पष्ट दिसत आहे.