चाकणच्या विकासाला नवी गती; खड्डे बुजविण्याचे आणि अतिक्रमण हटविण्याचे आदेश

पुणे: पुण्याचा औद्योगिक कणा असलेल्या चाकण परिसरातील प्रलंबित समस्यांचा तिढा सोडवण्यासाठी आणि परिसराचा कायापालट करण्यासाठी राज्य शासनाने आता अत्यंत कठोर आणि ठोस पावले उचलण्यास सुरुवात केली आहे. चाकणच्या विकासा साठी गठित करण्यात आलेल्या उच्चस्तरीय समितीच्या कामकाजाचा आणि विविध समस्यांचा सविस्तर आढावा घेण्यासाठी उपमुख्यमंत्री सुनेत्रा अजित पवार यांच्या अध्यक्षतेखाली शासकीय विश्रामगृहात एक अत्यंत महत्त्वाची उच्चस्तरीय आढावा बैठक पार पडली. चाकण मधील वाढती लोकसंख्या, औद्योगिक विस्तार आणि त्याोबतच वाढलेली वाहतूक कोंडी, खड्डे, कचरा व्यवस्थापन व सुरक्षेचे प्रश्न मार्गी लावण्यासाठी सर्व संबंधित यंत्रणांनी परस्पर समन्वयाने तातडीने कामाला लागण्याचे स्पष्ट निर्देश उपमुख्यमंत्री सुनेत्रा पवार यांनी यावेळी दिले आहेत.

       चाकण हे देश-विदेशातील उद्योजक व कामगारांचे मुख्य केंद्र असल्याने येथील पायाभूत सुविधा उच्च दर्जाच्या असणे अत्यंत आवश्यक असल्याचे सांगत उपमुख्यमंत्री पवार यांनी प्रशासनाला काही कडक निर्देश दिले आहेत. त्यानुसार, चाकण परिसरातील रस्त्यांवर पडलेले जीवघेणे खड्डे तातडीने बुजविण्याचे आदेश देण्यात आले असून, आगामी ३१ ऑगस्टपर्यंत सर्व खड्डे भरण्याचे काम पूर्ण करावे, अशी सक्त ताकीद देण्यात आली आहे. याशिवाय, सुरक्षेच्या प्रश्न गांभीर्याने घेत चाकणमध्ये तातडीने १०० अतिरिक्त सुरक्षा कर्मचाऱ्यांची नियुक्ती करण्याची कार्यवाही वेगाने सुरू आहे. रस्त्यांच्या कडेला साचणारा कचरा आणि प्लास्टिकचा प्रश्न सोडवण्यासाठी एमआयडीसीच्या माध्यमातून कचरा प्रक्रिया प्रकल्पासाठी जागा उपलब्ध करून देण्यात आली असून, लवकरात लवकर हा प्रकल्प उभा करण्याचे निर्देशही देण्यात आले आहेत. परिसरातील अनधिकृत अतिक्रमणांवर कुठलीही राजनैतिक वा अन्य दयामाया न दाखवता कठोर कारवाई केली जाईल, असे स्पष्ट करत स्थानिक नागरिकांनी व उद्योजकांनी या मोहिमेत प्रशासनाला पूर्ण सहकार्य करावे, असे आवाहन त्यांनी केले.

       बैठकीत झालेल्या निर्णयांची अंमलबजावणी कशी केली जाणार, याबाबत माहिती देताना जिल्हाधिकारी जितेंद्र डुडी यांनी सांगितले की, पुणे-चाकण पट्ट्यातील वाहतूक कोंडी दूर करण्यासाठी प्रशासन आणि पोलिसांच्या समन्वयातून एक ठोस 'ॲक्शन प्लॅन' तयार करण्यात आला आहे. यासाठी तातडीने १०० सुरक्षा कर्मचाऱ्यांची नियुक्ती करण्याची कार्यवाही करण्यात येत असून, दर शुक्रवारी सर्व विभागांच्या अधिकाऱ्यांची संयुक्त बैठक घेऊन या उपाय योजनांचा नियमित आढावा घेतला जाणार आहे. रस्त्यांवरील अतिक्रमणे हटवण्यासाठी आगामी शुक्रवार पासून प्रत्यक्ष मोहिमेला सुरुवात होईल आणि महिनाभरात ती पूर्ण केली जाईल. एमआयडीसी परिसरातील पार्किंगच्या जागा एका आठवड्यात अधिकृतपणे सुरू करून रस्त्यावर बेशिस्त उभे राहणारे ट्रक तिथे वळवले जाणार आहेत. तसेच, गर्दीच्या वेळेत जड वाहनांच्या प्रवेशावर कडक निर्बंध आणले असून औद्योगिक कंपन्यांच्या शिफ्टच्या वेळा बदलण्या बाबतही विचार सुरू आहे.

          पिंपरी-चिंचवडचे पोलिस आयुक्त विनयकुमार चौबे यांनी स्पष्ट केले की, वाढत्या नागरिकरणामुळे निर्माण झालेल्या ताणतणावाचा सामना करण्यासाठी पोलीस यंत्रणेने आपली पायाभूत तयारी वाढवली आहे. जिल्हा प्रशासन आणि उद्योग विभागाच्या सोबतीने अल्प, मध्यम आणि दीर्घकालीन योजना आखण्यात आल्या असून, वाहतूक सुरळीत करण्यासाठी रस्ते रुंदीकरण आणि अतिक्रमण निर्मूलनाला प्राधान्य दिले जात आहे. या बैठकीत एमआयडीसी, पीएमआरडीए, स्थानिक आमदार बाबाजी काळे, तसेच विविध औद्योगिक व व्यापारी संघटनांचे प्रतिनिधी मोठ्या संख्येने उपस्थित होते. उद्योजकांनी मांडलेल्या अडीअडचणी सहानुभूतीपूर्वक ऐकून घेत शासन स्तरावर सर्व प्रश्न लवकरात लवकर सोडवले जातील, अशी खात्री उपमुख्यमंत्री सुनेत्रा पवार यांनी दिली. या सर्व व्यापक नियोजनामुळे आगामी काळात चाकण परिसराचे चित्र पालटून नागरिकांना मोठा दिलासा मिळण्याची दाट शक्यता निर्माण झाली आहे.