पुणे रेल्वे स्थानकावर अमली पदार्थ विरोधी कारवाई; महिला प्रवासी अटकेत

पुणे: पुणे रेल्वे स्थानकावर महसूल गुप्तचर संचालनालयाच्या (DRI) पुणे प्रादेशिक पथकाने एका अत्यंत गोपनीय आणि धडक कारवाईत कोट्यवधी रुपयांचे प्रतिबंधित अमली पदार्थ जप्त केले आहेत. या प्रकरणी दिल्लीहून प्रवास करणाऱ्या एका महिला प्रवाशाला रंगेहाथ अटक करण्यात आली असून, तिच्याकडून जप्त करण्यात आलेल्या अ‍ॅम्फेटामाइन आणि एमडीएमए (MDMA) या अमली पदार्थांची आंतरराष्ट्रीय बाजार पेठेतील एकूण किंमत तब्बल ३ कोटी ४१ लाख रुपये असल्याचा अंदाज वर्तवला जात आहे. या मोठ्या कारवाईमुळे शहरात खळबळ उडाली आहे.

        डीआरआयच्या (DRI) मुंबई झोनल युनिट अंतर्गत कार्यरत असलेल्या पुणे प्रादेशिक पथकाला एका महिला प्रवाशाबाबत अत्यंत खात्रीशीर आणि गुप्त माहिती मिळाली होती. त्यानुसार, संबंधित महिला प्रवासी दिल्लीतील हजरत निजामुद्दीन रेल्वे स्थानकावरून रेल्वेने प्रवास करत पुण्यामार्गे जात होती. तिच्याकडे मोठ्या प्रमाणावर बेकायदा अमली पदार्थ असल्याचा संशय असल्यामुळे, DRI च्या अधिकाऱ्यांनी आधीच पाळत ठेवली होती. जशी ती महिला पुणे रेल्वे जंक्शनवर उतरली, तशी पथकाने तिला तातडीने ताब्यात घेत तिच्या सामानाची कसून तपासणी केली.

       या झडती दरम्यान महिला प्रवाशाच्या सामानातून तब्बल २ हजार ५३२ ग्रॅम वजनाचा पांढऱ्या-पिवळसर रंगाचा स्फटिकासारखा पदार्थ आढळून आला, जो प्राथमिक तपासणीत 'अ‍ॅम्फेटामाइन' (Amphetamine) असल्याचे स्पष्ट झाले आहे. याशिवाय, तिच्याकडे ८७८ ग्रॅम वजनाच्या विविध रंगांच्या अमली गोळ्या देखील सापडल्या, ज्या 'एमडीएमए' (MDMA) असल्याचा संशय आहे. या सर्व प्रतिबंधित व घातक पदार्थांची बाजारातील एकूण अंदाजे किंमत ३ कोटी ४१ लाख रुपये इतकी असल्याचे DRI कडून स्पष्ट करण्यात आले आहे.

        ही कारवाई अमली पदार्थ आणि मन:प्रभावी पदार्थ अधिनियम, १९८५ (NDPS Act) च्या कठोर कलमांखाली नोंदवून कायदेशीर रित्या पूर्ण करण्यात आली असून, आरोपी महिला प्रवाशाला अटक करण्यात आली आहे. या तस्करीमागे एखादे मोठे आंतरराज्यीय रॅकेट सक्रिय आहे का आणि हे अमली पदार्थ नेमके कोणाला पोहोचवले जाणार होते, या दिशेने आता तपास यंत्रणांनी कसून चौकशी सुरू केली आहे. देशातून आणि राज्यांतून अवैध अमली पदार्थांची तस्करी पूर्णपणे नष्ट करण्यासाठी तसेच केंद्र शासनाच्या ‘नशामुक्त भारत अभियान’च्या उद्दिष्टांना बळकटी देण्याच्या दृष्टीने DRI ची ही कारवाई अत्यंत महत्त्वाची मानली जात आहे.