नाशिक मध्ये ३३३ कुटुंबांचे घराचे स्वप्न साकार; म्हाडाच्या सोडतीत विजेत्यांची घोषणा

नाशिक: सर्वसामान्य नागरिकांचे स्वतःच्या मालकीच्या हक्काच्या आणि परवडणाऱ्या घराचे स्वप्न प्रत्यक्षात आणण्याच्या दिशेने म्हाडाच्या (MHADA Lottery 2026) नाशिक गृहनिर्माण व क्षेत्रविकास मंडळाने आणखी एक महत्त्वपूर्ण पाऊल उचलले आहे. नाशिक शहर परिसर आणि अहिल्यानगर येथील विविध आकर्षक गृहप्रकल्पां मधील एकूण ३३३ सदनिकांच्या विक्रीसाठी अत्यंत पारदर्शक पद्धतीने संगणकीय सोडत नुकतीच पार पडली. म्हाडाच्या नाशिक मंडळाचे सभापती रंजन ठाकरे यांच्या प्रमुख उपस्थितीत आणि हस्ते ही बहुचर्चित सोडत काढण्यात आली, ज्यामुळे घर खरेदीचे स्वप्न पाहणाऱ्या शेकडो नागरिकांच्या चेहऱ्यावर आनंदाचे हसू फुलले आहे.

       या संगणकीय सोडती मध्ये प्रामुख्याने नाशिक शहर परिसरातील पाथर्डी शिवार, म्हसरूळ शिवार, मखमलाबाद शिवार, चुंचाळे शिवार, आडगाव शिवार, सातपूर शिवार यांसारख्या वेगाने विकसित होणाऱ्या भागांमधील सदनिकांचा समावेश होता. याशिवाय अहिल्यानगर येथील म्हाडाच्या विविध गृहनिर्माण प्रकल्पां मधील घरांसाठीही या माध्यमातून नशीब आजमावण्यात आले. प्रशासना कडून मिळालेल्या अधिकृत माहिती नुसार, या ३३३ सदनिकांच्या सोडतीसाठी एकूण ४९३ अर्ज प्राप्त झाले होते, त्यापैकी कायदेशीर पूर्तता करत अनामत रकमेसह ३४१ अर्ज अंतिम प्रक्रियेसाठी पात्र ठरले होते. अत्याधुनिक संगणकीय प्रणालीचा वापर करून कोणतीही मानवी हस्तक्षेपाविना संपूर्ण पारदर्शकतेने विजेत्या अर्जदारांची निवड करण्यात आली. विशेष म्हणजे, सोडतीचा निकाल जाहीर झाल्यानंतर कार्यक्रमाच्या ठिकाणी उपस्थित असलेल्या भाग्यवान विजेत्या अर्जदारांचा सभापती रंजन ठाकरे यांच्या हस्ते पुष्पगुच्छ व सत्कार करून गौरव करण्यात आला.

        याप्रसंगी बोलताना सभापती रंजन ठाकरे यांनी गेल्या दीड वर्षाच्या कालावधीत म्हाडाच्या नाशिक मंडळा तर्फे संगणकीय व पारदर्शक सोडतींच्या माध्यमातून मोठ्या प्रमाणावर सर्वसामान्य व मध्यमवर्गीय नागरिकांना परवडणारी घरे उपलब्ध करून दिल्याची माहिती दिली. ज्या नागरिकांना या वेळच्या सोडतीत घर लागलेले नाही, त्यांनी अजिबात निराश होऊ नये, असे आश्वस्त आवाहन त्यांनी केले आहे. आगामी काळात नाशिक मंडळातर्फे विविध भागांतील नवीन प्रकल्पां मधील सदनिकांच्या विक्रीसाठी अशाच प्रकारच्या आणखी संगणकीय सोडती वारंवार आयोजित केल्या जाणार आहेत, त्यामुळे इच्छuक नागरिकांनी भविष्यातील संधींचा नक्की लाभ घ्यावा, असे आवाहनही त्यांनी केले.

         अर्जदारांना सोडतीसाठी प्रत्यक्ष हॉलमध्ये किंवा कार्यक्रम स्थळी उपस्थित राहण्याची कोणतीही कटकट राहावी नये आणि संपूर्ण प्रक्रिया अत्यंत पारदर्शक पद्धतीने घरबसल्या पाहता यावी, यासाठी म्हाडा प्रशासनाने या संगणकीय सोडतीचे थेट प्रक्षेपण आपल्या अधिकृत युट्यूब (YouTube) आणि फेसबुक (Facebook) चॅनेल वरून केले होते. तंत्रज्ञानाचा प्रभावी वापर करून नागरिकांना कोणत्याही त्रासाशिवाय हक्काचे घर उपलब्ध करून देण्यावर म्हाडाच्या नाशिक मंडळाचा नेहमीच भर राहिला आहे. आगामी काळातही अशाच प्रकारच्या अनेक सदनिका सोडतीसाठी उपलब्ध करून दिल्या जाणार असल्यामुळे, नाशिक आणि परिसरामध्ये स्वतःचे घर घेण्याचे स्वप्न बाळगणाऱ्या नागरिकांसाठी भविष्यातही सुवर्णसंधी उपलब्ध राहणार असल्याचे स्पष्ट झाले आहे.