सोशल मीडियावरील असत्य-अर्धसत्याला आळा घाला; ‘सत्य’ जनतेपर्यंत पोहोचवा – राज्यपाल जिष्णु देव वर्मा

मुंबई: आजच्या डिजिटल आणि समाज माध्यमांच्या युगात माहितीचा प्रचंड सुळसुळाट पाहायला मिळत असला आणि विविध माध्यमांचा विस्तार झपाट्याने होत असला, तरी छापील वृत्तपत्रांची विश्वासार्हता आजही अबाधित आणि अचल आहे. समाज माध्यमांवर सध्या असत्य, दिशाभूल करणारी आणि अर्धसत्य माहितीचा महापूर आल्यासारखा प्रसार होत आहे. अशा या आभासी गोंधळाच्या वातावरणातून अस्सल आणि खात्रीशीर सत्य शोधून ते जनतेपर्यंत पोहोचवण्याची अत्यंत महत्त्वाची व मोठी जबाबदारी आजच्या पत्रकारांवर आहे, असा मोलाचा संदेश राज्याचे राज्यपाल जिष्णु देव वर्मा यांनी दिला आहे. भारत सरकारच्या पत्र सूचना कार्यालयाच्या (PIB) माध्यमातून महाराष्ट्र भेटीवर आलेल्या छत्तीसगडच्या नक्षलग्रस्त भागातील तसेच बिहारमधील विविध माध्यम समूहांच्या पत्रकार आणि प्रतिनिधींच्या शिष्टमंडळाने राजभवनात राज्यपालांची सदिच्छा भेट घेतली, त्या वेळी ते संवाद साधत होते.

          मुंबईतील लोकभवन येथे पार पडलेल्या या सदिच्छा भेट कार्यक्रमाला पत्र सूचना कार्यालयाच्या पश्चिम विभागीय महासंचालक स्मिता वत्स शर्मा यांच्यासह छत्तीसगड आणि बिहारमधील माध्यम प्रतिनिधी आणि संबंधित शासकीय अधिकारी मोठ्या संख्येने उपस्थित होते. यावेळी पत्रकारांशी संवाद साधताना राज्यपाल जिष्णु देव वर्मा यांनी पत्रकारितेला लोकशाहीचा अत्यंत महत्त्वाचा व भक्कम स्तंभ असे संबोधले. केवळ कार्यालयात बसून बातम्या तयार करण्यापेक्षा प्रत्यक्ष क्षेत्रीय भेटी (Field Visits) देण्यामुळे पत्रकारांना एखाद्या विषयाचे प्रत्यक्ष, सखोल आणि समग्र आकलन होण्यास मोठी मदत होते, असे त्यांनी स्पष्ट केले. पत्रकार हे शासन आणि समाज यांच्यामधील अत्यंत महत्त्वाचा सेतू म्हणून प्रामाणिकपणे काम करतात, त्यामुळे लोकशाहीचा हा चौथा स्तंभ नेहमी ताठ, सरळ आणि नैतिकदृष्ट्या मजबूत राहिला पाहिजे, अशी अपेक्षा त्यांनी व्यक्त केली.

        वृत्तसंकलनाचे आणि बातम्यांच्या प्रसाराचे महत्त्व अधोरेखित करताना राज्यपालांनी पत्रकारांना सामाजिक जनजागृती मध्ये सक्रिय योगदान देण्याचे आवाहन केले. केवळ राजकीय घडामोडी किंवा दैनंदिन बातम्यांपुरते मर्यादित न राहता देशापुढील व समाजापुढील गंभीर प्रश्नांवर समाजमना मध्ये प्रबोधन घडवून आणणे माध्यमांचे कर्तव्य आहे. विशेषतः 'नशामुक्त भारत अभियान' आणि 'टीबीमुक्त भारत मोहीम' यांसारख्या महत्त्वाच्या राष्ट्रीय उपक्रमांबाबत जनते मध्ये व्यापक जनजागृती करण्याची नितांत गरज असल्याचे त्यांनी आवर्जून सांगितले. शासन तळागाळातील घटकांसाठी विविध कल्याणकारी योजना तयार करून त्यांची यशस्वी अंमलबजावणी करत असते, परंतु या योजनांची अचूक माहिती योग्य वेळी शेवटच्या घटकापर्यंत पोहोचवण्यात आणि त्याबाबत जनजागृती निर्माण करण्यात प्रसार माध्यमांची भूमिका अत्यंत निर्णायक ठरते, असे राज्यपाल जिष्णु देव वर्मा यांनी आपल्या मनोगतात नमूद केले. राज्यपालांच्या या मार्गदर्शनामुळे माध्यम प्रतिनिधी मध्ये एक नवा उत्साह आणि सामाजिक उत्तरदायित्वाची जाणीव निर्माण झाल्याचे दिसून आले.