पंढरपुरात सुप्रिया सुळे आक्रमक; शेतकरी कर्जमाफीसाठी सरकारला घेरले, आंदोलनाचा इशारा

पंढरपूर: महाराष्ट्रात ओढवलेल्या भीषण दुष्काळी परिस्थितीच्या पार्श्वभूमीवर राजकीय वातावरण चांगलेच तापले असून, महायुती सरकार विरोधात राष्ट्रवादी काँग्रेस शरदचंद्र पवार पक्षाने अत्यंत आक्रमक पवित्रा घेतला आहे. पंढरपुरात दुष्काळाच्या मुद्यावरून आयोजित करण्यात आलेल्या भव्य 'आक्रोश मोर्चानंतर' बोलताना खासदार सुप्रिया सुळे यांनी राज्य सरकारवर अत्यंत तीव्र शब्दांत निशाणा साधला. केवळ कागदावर दुष्काळ जाहीर करून किंवा घोषणांचे पॅकेज देऊन भागणार नाही, तर बळीराजाला खऱ्या अर्थाने वाचवायचे असेल तर सरसकट संपूर्ण कर्जमाफी आणि थेट बँक खात्यात आर्थिक मदत जमा झालीच पाहिजे, अशी आग्रही मागणी त्यांनी केली. विशेष म्हणजे, आंदोलनाची धार अधिक तीव्र करताना सामान्य नागरिकांना त्रास न देता थेट 'मंत्र्यांच्या गाड्या अडवा' असा सल्ला देत, यासाठी गरज पडल्यास तुरुंगात जाण्याचीही आपली पूर्ण तयारी आहे, असे खुली घोषणा करत त्यांनी सरकारविरोधात एल्गार पुकारला आहे.

           राज्यातील ३५८ पैकी तब्बल २६५ तालुक्यांमध्ये शासना कडून अधिकृतपणे दुष्काळ जाहीर करण्यात आला असून, त्यासोबतच जमीन महसुलात सूट, पीक कर्जाचे पुनर्गठन, कर्जवसुलीला स्थगिती, वीजबिलातील सवलती, परीक्षा शुल्कातून सूट आणि रोजगार हमीच्या कामांमध्ये वाढ यांसारख्या १२ कलमी उपायांचे पॅकेजही जाहीर करण्यात आले आहे. मात्र, या केवळ कागदी घोषणा असल्याचा घणाघात सुप्रिया सुळे यांनी केला आहे. दुष्काळ जाहीर झाल्याचे समजल्यावर आम्हाला सुरुवातीला समाधान वाटले होते, परंतु प्रत्यक्षात शेतकऱ्यांच्या हातावर काहीच पडत नसेल तर अशा घोषणांचा काय उपयोग? असा संतप्त सवाल त्यांनी उपस्थित केला. जोपर्यंत शेतकऱ्यांचे सर्व प्रश्न सुटत नाहीत आणि त्यांना हक्काची आर्थिक मदत मिळत नाही, तोपर्यंत हा लढा असाच सुरू राहील, असे त्यांनी स्पष्ट केले.

          आंदोलनाची रणनीती स्पष्ट करताना सुप्रिया सुळे यांनी कार्यकर्त्यांना आणि शेतकऱ्यांना थेट कृतीचा मार्ग दाखवला. शेतकऱ्यांच्या न्याय्य हक्कांसाठी रास्ता रोको केल्यास अनेकदा सर्वसामान्य नागरिकांना नाहक त्रास सहन करावा लागतो, त्यामुळे आता थेट धोरणकर्त्यांना जाब विचारण्याची वेळ आली आहे, असे त्यांनी नमूद केले. “मंत्र्यांच्या गाड्या अडवा... पोलीस अटक करत असतील तर करू दे, शेतकऱ्यांसाठी जेलमध्ये जाण्याची माझी तयारी आहे,” असे अत्यंत आक्रमक उद्गार काढत त्यांनी सरकारच्या भूमिकेवर थेट प्रश्नचिन्ह उपस्थित केले. सरकारच्यावतीने जरी दुष्काळग्रस्त भागात पंचनामे आणि प्रत्यक्ष पाहणीचे दावे केले जात असले, तरी प्रत्यक्षात मदत मिळण्यासाठी लागणारा विलंब बळीराजाला उद्ध्वस्त करणारा ठरत आहे.

         दुष्काळ जाहीर झाला असला तरी प्रत्यक्ष शेतकऱ्यांच्या बँक खात्यात पैसे जमा होईपर्यंत राष्ट्रवादी काँग्रेस शरद पवार पक्ष शेतकऱ्यांच्या पाठीशी खंबीरपणे उभा राहून संघर्ष करणार असल्याची ग्वाही सुप्रिया सुळे यांनी दिली. दुष्काळाची घोषणा आणि प्रत्यक्षात मिळणारी मदत यामध्ये पडणारी दरीच आता आगामी राजकीय संघर्षाची दिशा ठरवणार असल्याचे स्पष्ट झाले आहे. एका बाजूला शासना कडून उपाय योजनांची अंमलबजावणी सुरू असल्याचा दावा केला जात असताना, दुसरीकडे सुप्रिया सुळे यांनी घेतलेल्या या आक्रमक भूमिकेमुळे राज्यातील राजकीय वातावरण ढवळून निघाले असून, आगामी काळात हा संघर्ष आणखी तीव्र होण्याची दाट शक्यता निर्माण झाली आहे.