सातारा जिल्हा बँक निवडणुकीत रंगत; पहिल्याच दिवशी सहा उमेदवार रिंगणात, उदयनराजे-संजीवराजेंची एन्ट्री

सातारा: सातारा जिल्ह्याच्या आर्थिक आणि सहकार क्षेत्राचा कणा मानल्या जाणाऱ्या सातारा जिल्हा मध्यवर्ती सहकारी बँकेच्या २०२६ ते २०३१ या पंचवार्षिक निवडणुकीची औपचारिक प्रक्रिया अखेर अत्यंत उत्साहात आणि राजकीय घडामोडींच्या पार्श्वभूमीवर सुरू झाली आहे. शुक्रवारी नामनिर्देशन अर्ज स्वीकारण्याच्या पहिल्याच दिवशी जिल्ह्यातील विविध मतदार संघांतून तब्बल सहा उमेदवारांनी आपले अर्ज अधिकृतपणे दाखल करत निवडणुकीच्या रिंगणात जोरदार एंट्री केली आहे. पहिल्याच दिवशी खासदार उदयनराजे भोसले आणि संजीवराजे नाईक-निंबाळकर यांच्या सारख्या सहकार व राजकारणातील वजनदार नेत्यांनी आपले अर्ज दाखल केल्यामुळे सातारा जिल्हा बँकेच्या या निवडणुकीची उष्णता पहिल्याच दिवशी शिगेला पोहोचल्याचे पाहायला मिळत आहे.

        निवडणुकीच्या पहिल्या दिवशी दाखल झालेल्या अर्जांमध्ये विविध मतदारसंघा मधील राजकीय समीकरणांची झलक स्पष्टपणे दिसून येत आहे. कोरेगाव तालुका मतदार संघातून सुनील रवेलचंद खत्री यांनी दोन नामनिर्देशनपत्रे सादर केली आहेत. त्याचप्रमाणे, अतिशय प्रतिष्ठेच्या मानल्या जाणाऱ्या गृहनिर्माण सहकारी संस्था तसेच दूध उत्पादक, पशुपैदास, वराह पालन, कुक्कुटपालन व शेळी-मेंढी पालन संस्था या संयुक्त मतदारसंघातून छत्रपती उदयनराजे प्रतापसिंह भोसले यांनी आपला उमेदवारी अर्ज दाखल केला आहे. दुसरीकडे, फलटण तालुका विकास सेवा सहकारी संस्था आणि धान्य अधिकोष मतदार संघातून संजीवराजे विजयसिंह नाईक-निंबाळकर यांनीही अर्ज भरत आपल्या राजकीय प्रभावाची चुणूक दाखवून दिली आहे. याशिवाय, अनुसूचित जाती-जमाती राखीव मतदारसंघातून दीपक प्रल्हाद चव्हाण, नागरी बँका, नागरी सहकारी पतपेढ्या, ग्रामीण बिगरशेती संस्था व पगारदार नोकरांच्या पतसंस्था मतदारसंघातून सुरभी मदन भोसले, तर महिला राखीव मतदारसंघातून अनुपमा शाहूराज फाळके यांनी आपले अर्ज निवडणूक अधिकारी कार्यालयात सादर केले आहेत.

        दरम्यान, शनिवार आणि रविवार (२६ व २७ सप्टेंबर) रोजी शासकीय सुट्टी व विकेंड असल्यामुळे या दोन दिवशी उमेदवारांना अर्ज विकत घेण्याची किंवा जमा करण्याची प्रक्रिया बंद राहणार आहे. त्यानंतर ही प्रक्रिया पुन्हा एकदा गती घेणार असून, २८ सप्टेंबर ते १ ऑक्टोबर या कालावधीत दररोज सकाळी ११ ते दुपारी ३ या निश्चित वेळेत इच्छुक उमेदवारांना आपले नामनिर्देशनपत्र दाखल करता येणार आहेत. निवडणुकीच्या पार्श्वभूमीवर प्रशासकीय कार्यालयात अनावश्यक गर्दी होऊ नये आणि कायदा-सुव्यवस्थेचा प्रश्न निर्माण होऊ नये, यासाठी निवडणूक यंत्रणेने कडक नियम लागू केले आहेत. अर्ज दाखल करण्यासाठी निवडणूक कार्यालयात जाताना केवळ खुद्द उमेदवार किंवा त्यांच्या अधिकृत सूचकानेच उपस्थित राहावे, असे स्पष्ट निर्देश निवडणूक निर्णय अधिकारी तथा जिल्हा उपनिबंधक, सहकारी संस्था, सातारा यांनी दिले आहेत. कोणत्याही राजकीय पक्षाच्या कार्यकर्त्यांनी किंवा समर्थकांनी कार्यालयाच्या परिसरात गर्दी करू नये, असे आवाहनही प्रशासना कडून करण्यात आले आहे. आगामी पाच वर्षांसाठी अत्यंत महत्त्वपूर्ण ठरणाऱ्या या निवडणुकीची संपूर्ण प्रक्रिया अत्यंत पारदर्शक, शांततापूर्ण आणि नियमा नुसार पार पाडण्यासाठी सर्व संबंधितांनी प्रशासनाला सहकार्य करावे, असे आवाहन करण्यात आले आहे.