सातारा: गणेशोत्सवाच्या विसर्जन मिरवणुकांचा रोमहर्षक व पारंपरिक उत्साह ओसरत असतानाच, सातारा जिल्ह्यात डीजे आणि डॉल्बी साऊंड सिस्टीमवर पोलिसांनी केलेल्या कठोर कारवाईवरून आता जोरदार राजकीय रणकंदन सुरू झाले आहे. विसर्जन मिरवणुकी दरम्यान उच्च न्यायालय आणि शासनाने निर्धारित केलेल्या ध्वनि मर्यादेचे उल्लंघन केल्याचा ठपका ठेवत सातारा पोलिसांनी काही दिवसांपूर्वीच धडक कारवाई करत साऊंड सिस्टीम जप्त केल्या होत्या. या कारवाईमुळे एकीकडे ध्वनिप्रदूषणा विरोधात लढा देणाऱ्या ज्येष्ठ नागरिक व डॉक्टरांनी समाधान व्यक्त केले होते; मात्र आता खुद्द खासदार छत्रपती उदयनराजे भोसले यांनी या पोलीस कारवाईवर थेट आक्षेप घेत डीजे आणि डॉल्बी चालकांची उघडपणे बाजू सावरून धरल्यामुळे साताऱ्याच्या राजकीय वर्तुळात खळबळ उडाली आहे. या संपूर्ण वादात जिल्ह्याचे पालकमंत्री शंभूराज देसाई यांनी सावध व संतुलित भूमिका घेत नियमांचे उल्लंघन झाले नसेल तर कारवाईची सखोल चौकशी केली जाईल, असे स्पष्ट केले आहे.
अनंत चतुर्दशीच्या मिरवणुकी दरम्यान कर्णकर्कश डीजेचा दणदणाट आणि नियमांचे उल्लंघन करणाऱ्यांवर सातारा शहर आणि शाहूपुरी पोलिसांनी संयुक्तरीत्या मोठी मोहीम राबवत सुमारे १५ गुन्हे दाखल केले होते आणि कोट्यवधी रुपयांचा मुद्देमाल व साऊंड सिस्टीम जप्त केली होती. या कारवाईमुळे सणाच्या उत्साहाला गालबोट लागले असले तरी सामान्य नागरिक, अभ्यास करणारे विद्यार्थी आणि रुग्णांना त्यामुळे मोठा दिलासा मिळाला होता. शहरातील ज्येष्ठ नागरिक आणि डॉक्टरांच्या शिष्टमंडळाने यापूर्वीच ध्वनिप्रदूषणा विरोधात मूक मोर्चा काढून प्रशासनाचे लक्ष वेधले होते. मात्र, या सर्व घडामोडींच्या पार्श्वभूमीवर खासदार उदयनराजे भोसले यांनी पोलीस प्रशासनाच्या कार्य पद्धतीवर प्रश्नचिन्ह उपस्थित केले आहे.
वर्षभरातून एकदा येणाऱ्या सणासुदीच्या काळात तरुणांचा आनंद आणि साऊंड सिस्टीम चालकांच्या लहान-मोठ्या व्यवसायावर अशा प्रकारे अचानक कठोर पोलिसी बडगा उगारणे चुकीचे असल्याचे त्यांनी म्हटले आहे. किरकोळ कारणांवरून किंवा सणाच्या आनंदात विनाकारण केलेली कारवाई ही अयोग्य असून, यामुळे उत्सवाचा उत्साह मावळतो, अशी स्पष्ट भूमिका घेत उदयनराजेंनी थेट चालकांच्या पाठीशी उभे राहण्याचे संकेत दिले आहेत.
दुसरीकडे, या प्रकरणी वाढत्या राजकीय व सामाजिक चर्चेच्या पार्श्वभूमीवर सातारा जिल्ह्याचे पालकमंत्री शंभूराज देसाई यांनी अत्यंत संयमी आणि प्रशासकीय भूमिका मांडली आहे. न्यायालयाचे आदेश आणि सर्वसामान्यांचे आरोग्य सुरक्षित ठेवणे ही प्रशासनाची जबाबदारी असली, तरीही जर कोणत्याही संबंधित चालकाने किंवा गणेश मंडळाने प्रशासनाने घालून दिलेल्या ध्वनि मर्यादेचे व नियमांचे तंतोतंत पालन केले असेल, आणि तरीही त्यांच्यावर चुकीची किंवा अन्यायकारक कारवाई झाली असल्याचे समोर आल्यास, त्या संपूर्ण प्रकरणाची तातडीने चौकशी केली जाईल, असे आश्वासन पालकमंत्र्यांनी दिले आहे.
कायद्याचा बडगा उगारताना कुणावरही अन्याय होणार नाही याची काळजी प्रशासनाने घ्यावी, असेही त्यांनी सुचवले आहे. एका बाजूला खासदार उदयनराजेंची आक्रमक पाठराखण आणि दुसरीकडे पालकमंत्र्यांनी दिलेली चौकशीची ग्वाही यामुळे साताऱ्यात डीजे-डॉल्बीच्या मुद्यावरून सत्ताधारी व राजकीय नेत्यांमधील मतभेद चव्हाट्यावर आले आहेत. उत्सवाचा अथांग आनंद, परंपरेचे जतन आणि कायदेशीर निर्बंध या तिहेरी संघर्षात आता प्रशासन नेमकी काय भूमिका घेणार आणि हा वाद कसा मिटणार, याकडे संपूर्ण जिल्ह्याचे लक्ष लागले आहे.
.jpeg)
.jpeg)
.jpeg)
