पुण्यात बसमध्ये चढताना पाय घसरला; विद्यार्थिनीचा चाकाखाली मृत्यू

पुणे: पुणे शहरातून एक अत्यंत मन हेलावून टाकणारी आणि दुःखद घटना समोर आली आहे. सिंहगड रोडवरील माणिकबाग परिसरात बसमध्ये चढत असताना पाय घसरून रस्त्यावर पडलेल्या एका महाविद्यालयीन तरुणीचा मागून येणाऱ्या स्कूलबसच्या चाकाखाली खाली आल्याने जागीच मृत्यू झाला. या भीषण अपघातानंतर माणिकबाग परिसरात एकच हळहळ व्यक्त होत असून, ऐन तरुण वयात झालेल्या या अकाली मृत्यू मुळे सर्वत्र शोककळा पसरली आहे.

      मिळालेल्या माहिती नुसार, मृत पावलेली तरुणी मूळची राजस्थान येथील असून ती पुण्यात एका नामांकित अभियांत्रिकी महाविद्यालयात (इंजिनिअरिंग कॉलेज) द्वितीय वर्षात शिक्षण घेत होती. ती नेहमीप्रमाणे खानापूर ते स्वारगेट या मार्गावर धावणाऱ्या बसने प्रवास करण्यासाठी आली होती. दरम्यान, माणिकबाग परिसरातील बस थांब्यावर बस पकडत असताना प्रवाशांची प्रचंड गर्दी असल्यामुळे बसमध्ये चढताना तिचा अचानक पाय घसरला आणि तोल जाऊन ती थेट रस्त्यावर खाली पडली.

     याच सुमारास तिच्या अगदी मागून येणाऱ्या एका स्कूल बसच्या चाकाखाली ती आल्यामुळे तिला गंभीर दुखापत झाली. या भीषण अपघातानंतर रस्त्यावर एकच तारांबळ उडाली. उपस्थित नागरिकांनी आणि स्थानिकांनी अत्यंत तत्परता दाखवत गंभीर जखमी झालेल्या तरुणीला तातडीने उपचारासाठी जवळच्या रुग्णालयात हलवले. मात्र, रुग्णालयात पोहोचण्यापूर्वीच तिचा मृत्यू झाला असल्याचे डॉक्टरांनी तपासून घोषित केले. या दुर्दैवी घटनेची माहिती मिळताच स्थानिक पोलिसांनी तातडीने घटनास्थळी धाव घेऊन परिस्थितीचा आढावा घेतला आणि मृतदेह शवविच्छेदनासाठी पाठवला. याप्रकरणी पोलिसांकडून पुढील कायदेशीर तपास सुरू असून, बस गर्दी आणि वाहतूक सुरक्षेचा प्रश्न पुन्हा एकदा ऐरणीवर आला आहे.