मुंबई : राज्यातील बेरोजगार आणि नोकरीच्या शोधात असलेल्या तरुण-युवतींसाठी एक अत्यंत दिलासादायक आणि महत्त्वाची बातमी समोर आली आहे. मुंबई उपनगर जिल्ह्यातील युवकांना त्यांच्याच परिसरात थेट रोजगाराच्या संधी उपलब्ध करून देण्यासाठी जिल्हा प्रशासनाने कंबर कसली आहे. 'सेवा संकल्प अभियानांतर्गत' आगामी २९ सप्टेंबर २०२६ रोजी मुंबई उपनगर जिल्ह्यातील अंधेरी, कुर्ला, बोरिवली आणि वांद्रे परिसरातील तब्बल २६ वेगवेगळ्या ठिकाणी भव्य 'पंडित दीनदयाळ उपाध्याय रोजगार महाकुंभ महाराष्ट्र' या महामेळाव्याचे आयोजन करण्यात आले आहे. मुंबई उपनगरचे जिल्हाधिकारी सौरभ कटियार यांनी या उपक्रमाची माहिती देत जिल्ह्यातील जास्तीत जास्त युवक-युवतींनी या सुवर्णसंधीचा लाभ घेण्याचे आवाहन केले आहे.
हा भव्य रोजगार मेळावा सकाळी दहा ते सायंकाळी पाच या वेळेत पार पडणार आहे. यामध्ये उत्पादन (मॅन्युफॅक्चरिंग), अभियांत्रिकी (इंजिनिअरिंग), बँकिंग व वित्तीय सेवा, माहिती तंत्रज्ञान (IT), विविध सेवा क्षेत्र तसेच वाहतूक व लॉजिस्टिक्स यांसारख्या अत्यंत वेगाने विकसित होणाऱ्या क्षेत्रांतील नामवंत खासगी कंपन्या आणि कॉर्पोरेट संस्था सहभागी होणार आहेत. युवकांना या मेळाव्यात सहज सहभाग घेता यावा आणि योग्य नियोजन करता यावे यासाठी प्रशासनाच्या वतीने विशेष ऑनलाइन नोंदणीची सुविधा उपलब्ध करून देण्यात आली असून, इच्छुक उमेदवारांनी [https://forms.gle/vBTzRQKYBBuBT4em7](https://forms.gle/vBTzRQKYBBuBT4em7) या लिंकवर जाऊन आपली पूर्वनोंदणी पूर्ण करण्याचे आवाहन करण्यात आले आहे. रोजगार मेळाव्यात अधिकाधिक तरुणांचा सहभाग सुनिश्चित करण्यासाठी उमेदवार नोंदणी आणि योग्य मार्गदर्शन करण्यावर विशेष भर देण्यात आला आहे.
या रोजगार महाकुंभासाठी मुंबई उपनगर परिसरातील अनेक नामांकित शैक्षणिक संस्था, शासकीय व खासगी औद्योगिक प्रशिक्षण संस्था (ITI), तसेच विद्यापीठे आणि व्यावसायिक प्रशिक्षण देणाऱ्या संस्थांनी सक्रिय सहभाग नोंदवला आहे. बोरिवली भागात लालजी मेहरोत्रा टेक्निकल इन्स्टिट्यूट, शासकीय औद्योगिक प्रशिक्षण संस्था, क्वास्टेक, झगडू सिंग चॅरिटेबल ट्रस्टचे ठाकूर स्पेशलाइज्ड डिग्री कॉलेज आणि विवेक कॉलेज ऑफ कॉमर्स, गोरेगाव यांसारख्या प्रमुख केंद्रांवर या सुविधा उपलब्ध असतील. त्याचप्रमाणे कुर्ला आणि पूर्व उपनगर भागात मानखुर्दची नवजीवन पॉलिटेक्निक, सोबती फाऊंडेशन, ॲटलस स्किलटेक युनिव्हर्सिटी, के. जे. सोमय्या पॉलिटेक्निक, घाटकोपरचे श्रीमती पी. एन. दोशी महिला महाविद्यालय, अण्णा लीला कॉलेज, शोभा जयाराम शेट्टी कॉलेज, लक्ष्मीचंद गोलवाला कॉलेज, विनायक गणेश वझे कॉलेज आणि मुलुंड कॉलेज ऑफ कॉमर्स यांसारख्या अग्रगण्य संस्थांमध्येही या उपक्रमाचे आयोजन करण्यात आले आहे.
यासोबतच अंधेरी व पश्चिम उपनगरातील नव समाज मंडळ महाविद्यालय, सॅपिओ ॲनालिटिक्स, असॉर्ट १ कॉर्प सर्व्हिसेस लिमिटेड, उषा मित्तल इन्स्टिट्यूट ऑफ टेक्नॉलॉजी, चेतना कॉलेज, वांद्रे येथील फादर ॲग्नेल कॉलेज, युवा प्रतिष्ठान खेरवाडी, शासकीय पॉलिटेक्निक मुंबई, एम. एल. डहाणुकर कॉलेज ऑफ कॉमर्स, भवन्स कॉलेज आणि विलेपार्ले येथील साठ्ये कॉलेज यांसारख्या उच्च शिक्षणाच्या प्रमुख संस्थांमध्येही रोजगाराचे दालन खुले राहणार आहे. या महामेळाव्याबाबत अधिक माहितीसाठी किंवा मार्गदर्शनासाठी जिल्हा सहायक आयुक्त, कौशल्य विकास मुंबई उपनगर शैलेश भगत (संपर्क: ७७१९८२६२६०), जिल्हा समन्वयक विलेश संखे (संपर्क: ९८६९१७४०६६) किंवा नोडल अधिकारी (संपर्क: ८४२१५७५०५१) यांच्याशी संपर्क साधता येईल. मुंबईतील तरुणांनी या भव्य उपक्रमाचा जास्तीत जास्त लाभ घेऊन आपल्या करिअरची यशस्वी सुरुवात करावी, असे आवाहन प्रशासना कडून करण्यात आले आहे.
