पिंपरी-चिंचवड: अचूक नेमबाजी, प्रचंड संयम आणि अभूतपूर्व सांघिक कौशल्याच्या बळावर भारतीय महिला कंपाऊंड तिरंदाजी संघाने एची-नागोया आशियाई क्रीडा स्पर्धेत सुवर्णपदकावर सोनेरी मोहोर उमटवली आहे. अत्यंत अटीतटीच्या अंतिम फेरीत बलाढ्य चीनचा २३८ विरुद्ध २३४ गुणांनी पराभव करत भारतीय संघाने ऐतिहासिक विजय मिळवला. या सुवर्णयशात महाराष्ट्रातील पिंपरी-चिंचवडची प्रतिभावान खेळाडू प्रिथिका प्रदीप हिने अत्यंत महत्त्वाची भूमिका बजावत देशासह राज्याचे नाव जागतिक पातळीवर उंचावले आहे. तिच्या या दैदिप्यमान कामगिरीमुळे पिंपरी-चिंचवडच्या क्रीडा इतिहासात एका सुवर्णपानाची भर पडली असून, संपूर्ण शहरात आनंदाचे व अभिमानाचे वातावरण पसरले आहे.
या अत्यंत चुरशीच्या स्पर्धेत प्रिथिका प्रदीप, ज्योती सुरेखा वेन्नम आणि चिकिता तनीपार्थी या तीन खेळाडूंच्या त्रिकुटाने संपूर्ण स्पर्धेत अप्रतिम खेळाचे प्रदर्शन केले. विशेष म्हणजे, अंतिम सामन्यात भारतीय संघाने नोंदवलेले २३८ गुण हे २०१४ मध्ये दक्षिण कोरियाने प्रस्थापित केलेल्या जागतिक आणि आशियाई विक्रमाशी बरोबरी करणारे ठरले. या ऐतिहासिक विजयासह भारतीय महिला संघाने आशियाई स्पर्धेतील आपले विजेतेपद यशस्वीरीत्या कायम राखले आहे. सुवर्णपदकापर्यंतचा हा प्रवास अत्यंत रोमांचक होता; कारण उपांत्य फेरीच्या लढतीत भारताने गतविजेत्या दक्षिण कोरियावर अवघ्या एका गुणाने म्हणजेच २३४ विरुद्ध २३३ असे मात करत अंतिम फेरीत धडक मारली होती. अत्यंत दबावाच्या आणि टोकाच्या क्षणी भारतीय तिरंदाजांनी दाखवलेले मानसिक स्थैर्य आणि अचूकता कौतुकास्पद ठरली.
पिंपरी-चिंचवड शहराच्या क्रीडा पटलावर मानाचा तुरा रोवणाऱ्या प्रिथिकाच्या या यशामागे तिची दुर्दम्य जिद्द, कठोर परिश्रम, नियमित सराव आणि पालकांचा भक्कम पाठिंबा आहे. तिच्या या संपूर्ण प्रवासात राष्ट्रीय प्रशिक्षक कुणाल टावरे यांचे मोलाचे आणि तांत्रिक मार्गदर्शन लाभले. पिंपरी-चिंचवड आर्चरी असोसिएशनच्या माध्यमातून शहरात खेळाडूंना मिळणारे व्यासपीठ या यशात महत्त्वाची भूमिका बजावून गेले आहे. प्रिथिकाच्या या यशाबद्दल महाराष्ट्र धनुर्विद्या संघटनेच्या सहसचिव तथा पिंपरी-चिंचवड आर्चरी असोसिएशनच्या सचिव सोनल बुंदेले यांनी विशेष गौरव केला आहे. शालेय वयात असतानाच प्रिथिकाच्या आतील खेळाची गुणवत्ता आणि विशेष टॅलेंट ओळखता आले होते, तिची जिद्द आणि खेळाप्रती असलेली निष्ठा आज तिला आशियाई स्पर्धेच्या सर्वोच्च शिखरावर घेऊन गेली आहे, अशा शब्दांत त्यांनी कौतुक केले. भविष्यातही असोसिएशनच्या माध्यमातून गुणवंत खेळाडूंना अशाच प्रकारची योग्य व उच्चप्रतीची संधी मिळवून देण्यासाठी प्रयत्न केले जातील, असे त्यांनी स्पष्ट केले. या दणदणीत विजयामुळे पिंपरी-चिंचवड मधील शेकडो उदयोन्मुख खेळाडूंना आंतरराष्ट्रीय स्तरावर चमकण्याची नवी प्रेरणा मिळाली आहे.
