पुणे पोलिसांकडून पोलीस ठाण्यांची ‘कामगिरी तपासणी’; ACP घेणार प्रलंबित प्रकरणांचा आढावा

पुणे : पुणे शहरातील पोलीस ठाण्यांच्या कामकाजाचा आढावा घेण्यासाठी आणि प्रलंबित गुन्हे व नागरिकांच्या तक्रारींचा जलद निपटारा करण्यासाठी पुणे पोलिसांनी विशेष पाहणी मोहीम हाती घेतली आहे. शहरातील सर्व विभागीय सहाय्यक पोलीस आयुक्तांना (ACP) आपापल्या विभागातील पोलीस ठाण्यांना प्रत्यक्ष भेट देऊन कामकाजाची तपासणी करण्याचे निर्देश देण्यात आले आहेत.

        या आदेशा नुसार १ ऑक्टोबर ते १५ ऑक्टोबर २०२६ या कालावधीत सहाय्यक पोलीस आयुक्त नियोजित वेळापत्रकानुसार विविध पोलीस ठाण्यांना भेटी देणार आहेत. या दौऱ्यादरम्यान ठाण्यांमधील प्रलंबित गुन्हे, नागरिकांच्या तक्रारी आणि दैनंदिन कामकाजाचा प्रत्यक्ष आढावा घेतला जाणार आहे.

प्रलंबित गुन्ह्यांच्या तपासावर विशेष लक्ष

दीर्घकाळापासून तपास प्रलंबित असलेल्या गुन्ह्यांचा आढावा घेऊन त्यातील अडचणी दूर करण्यासाठी संबंधित तपासी अधिकाऱ्यांना आवश्यक मार्गदर्शन केले जाणार आहे. प्रलंबित प्रकरणांचा तपास वेगाने पूर्ण करण्यावर या पाहणीदरम्यान भर राहणार आहे. नागरिकां कडून पोलीस ठाण्यांमध्ये दाखल करण्यात आलेल्या तक्रार अर्जांवर काय कारवाई करण्यात आली, किती अर्ज प्रलंबित आहेत आणि त्यांचा निपटारा किती वेळेत करण्यात आला, याचीही तपासणी सहाय्यक पोलीस आयुक्तांकडून केली जाणार आहे.याशिवाय पोलीस ठाण्याचे दैनंदिन कामकाज, कायदा व सुव्यवस्थेची स्थिती, सुरक्षाव्यवस्था आणि अधिकारी-कर्मचाऱ्यांच्या कामकाजाचाही आढावा घेतला जाणार आहे.

शहरातील विविध पोलीस ठाण्यांचा दौऱ्यात समावेश

       या विशेष पाहणी मोहिमेत फरासखाना, विश्रामबाग, स्वारगेट, भारती विद्यापीठ, कोथरूड, सिंहगड रोड, खडकी, येरवडा, वानवडी, लष्कर, हडपसर, लोणी काळभोर, लोणीकंद आणि खराडी यांसह शहरातील विविध विभागांतील पोलीस ठाण्यांना भेटी दिल्या जाणार आहेत. या पाहणीमुळे पोलीस ठाण्यांच्या कामकाजावर वरिष्ठ अधिकाऱ्यांचे थेट नियंत्रण राहण्यास मदत होणार असून, प्रलंबित गुन्ह्यांचा तपास आणि नागरिकांच्या तक्रारींचा निपटारा अधिक वेगाने होण्याची अपेक्षा आहे.