लोहगाव: पुणे शहरात चिमुकल्या मुलींच्या सुरक्षेचा प्रश्न पुन्हा एकदा अत्यंत ऐरणीवर आला आहे. विश्रांतवाडी परिसरातील धक्कादायक घटनेची शाई वाळते ना वाळते तोच, लोहगाव येथील पवार वस्ती परिसरात एका अवघ्या ४ वर्षांच्या बालिकेवर लैंगिक अत्याचार झाल्याची मन सुन्न करणारी घटना समोर आली आहे. याप्रकरणी पोलिसांनी तत्परता दाखवत आरोपीला अटक केली असली, तरी अवघ्या काही दिवसांत घडलेल्या या पाठोपाठच्या घटनांमुळे पुणेकर सुन्न झाले असून नागरिकांमधून तीव्र संताप व्यक्त होत आहे.
मिळालेल्या माहितीनुसार, लोहगावमधील पवार वस्ती परिसरातील एका चार वर्षीय बालिकेला जाळ्यात ओढून तिच्यावर लैंगिक अत्याचार करण्यात आला. पीडित बालिकेच्या पालकांच्या तक्रारीवरून पोलिसांनी तात्काळ बालकांचे लैंगिक अपराधांपासून संरक्षण कायद्यांतर्गत (पोक्सो - POCSO) तसेच भारतीय न्याय संहितेच्या संबंधित कलमांनुसार गुन्हा दाखल केला आहे. घटनेचे गांभीर्य ओळखून पोलिसांनी तातडीने तपासचक्र फिरवून आरोपीच्या मुसक्या आवळल्या आहेत.
विश्रांतवाडीनंतर पुन्हा तीच पुनरावृत्ती!
विशेष म्हणजे, काही दिवसांपूर्वीच विश्रांतवाडी परिसरातही अशाच प्रकारची अत्यंत चीड आणणारी घटना घडली होती. त्या घटनेचा तपास सुरू असतानाच लगेचच लोहगावच्या पवार वस्ती भागात ही दुसरी घटना घडल्याने कायदा अन् सुव्यवस्थेवर मोठे प्रश्नचिन्ह निर्माण झाले आहे. उपनगरांमध्ये लहान मुलांच्या सुरक्षेचा प्रश्न इतका गंभीर का बनत चालला आहे? असा उद्विग्न सवाल आता नागरिक विचारत आहेत.
वाढत्या घटनांमुळे जनक्षोभ; कठोर कारवाईची मागणी
गेल्या काही दिवसांत नराधमांची हिंमत वाढल्याचे चित्र दिसत असून, अशा विकृत मानसिकतेच्या गुन्हेगारांवर पोलिसांचा अन् कायद्याचा धाक उरला आहे की नाही, असा सवाल उपस्थित केला जात आहे. अशा घटना केवळ गुन्हेगारीपुरत्या मर्यादित नसून समाजाच्या सुरक्षेला लागलेला मोठा तडा आहे. पवार वस्ती आणि परिसरातील नागरिकांनी या घटनेचा तीव्र निषेध नोंदवला असून, अशा विकृत आरोपीला जलदगती न्यायालयात खटला चालवून कठोरात कठोर शिक्षा देण्यात यावी, तसेच उपनगरांमध्ये गस्त वाढवून बालकांच्या सुरक्षेसाठी ठोस पावले उचलली जावीत, अशी आक्रमक मागणी केली जात आहे.
